Qendra Spitalore Universitare ‘Nënë Tereza’ ka reaguar lidhur me denoncimin e bërë dje nga deputetja Albana Vokshi e cila në një deklaratë për mediat publikoi emaile ku sipas saj provohet se në pediatrinë e QSUT u është ndryshuar data e skadencës ilaçeve për fëmijë.
Në reagimin e bërë në rrjetin social facebook, QSUT mohon një deklaratë të tillë dhe sqaron se po synohet të dëmtohet puna e ekipit mjekësor. Sipas reagimit zyrtar, nuk ka raste apo mundësi për ndryshimin e datës së skandencës në ilaçe por theksohet se emaile-t e publikuara tregojnë procesin e menaxhimit administrative dhe nuk lidhen me përdorimin e ilaçeve nga pacientët.
Pra spitali pretendon se në emailet e publikuara dje nga Albana Vokshi është kërkuar të bëhet transferimi në magazinë i ilaçeve të skaduara dhe jo të përdoren nga pacientët.
Reagimi i plotë i QSUT:
Njoftojmë të gjithë qytetarët se lajmet e fundit të publikuara nga disa media për cilësinë e medikamenteve të përdorura në QSUT, janë të PAVËRTETA! NË QSUT NUK PËRDOREN ILAÇE TË SKADUARA!
Ato që janë servirur si "dokumente" dhe "prova" kanë të bëjnë me procesin e menaxhimit administrativ, dhe NUK kanë të bëjnë në asnjë rast me lëvizjen fizike të sasisë gjendje të medikamenteve të magazinuara dhe aq më tepër për përdorimin e tyre për pacientët.
KJO ËSHTË LEHTËSISHT E PROVUESHME *në Farmacinë e Spitalit*
Ngritja e këtyre pretendimeve të pabaza, PO DËMTON QËLLIMISHT punën e ekipit mjekësor në shërbim të pacientëve!
Sqarojmë se në sistemin elektronik SISP, lëvizja e medikamenteve në të gjitha nivelet, nga Farmacia Qendrore deri në nivel pacienti, bëhet vetëm brenda vlefshmërisë (skadencës) së medikamentit, dhe pas këtij afati, çdo lëvizje bllokohet automatikisht nga sistemi në të gjitha nivelet.
Theksojmë që për terapinë ditore të pacientit, ËSHTË E BLLOKUAR DHE E PAMUNDUR të shkarkohet një medikament i skaduar.
NUK EKZISTON DHE NUK KA ASNJË RAST APO MUNDËSI TË NDRYSHIMIT TË SKADENCËS SË NJË MEDIKAMENTI.
Në lidhje me rastin e pretenduar theksojmë se për nevoja administrative, me qëllim diferencimin e medikamentit të skaduar është kërkuar transferimi i sasisë së medikamentit të skaduar nga një magazinë në tjetrën. Kjo për arsye se medikamenti i skaduar fizikisht duhet zhvendosur në karantinën e përcaktuar për ruajtjen e medikamenteve të skaduara, sipas rregullave në fuqi. Kjo procedurë po përdoret në mënyrë spekulative si rast ku këto ilaçe janë përdorur për pacientët. Sigurojmë se kjo gjë nuk ka ndodhur dhe se sasia stok e medikamenteve të skaduara është e pandryshuar. Nëse do ishte përdorur, do kishte ndryshim të gjendjes stok, çka provon se ky pretendim i hedhur qëllimisht në media është dezinformues.
Veprimet në sistem bëhen kryesisht pas orës 16.00 me qëllim shmangien e lëvizjes së tyre gabimisht nga përdorues në nivelet e tjera (përgjegjës te farmacive spitalore ose kryeinfermier të pavijoneve) që operojnë në sistem deri në orën 16.00.
Për sa i përket citimit se është mashtruar Parlamenti, në korrespondencë zyrtare QSUNT është shprehur se: "_Aktualisht në Farmacinë Qendrore NUK ka sasi të medikamentit Feiba (Factor VIII inhibitor bypassing activity) 1000 UI Flakon...; Kjo, pasi sasia e mbetur prej 1137 flakon nga donacioni i përfituar për herë të parë gjatë vitit 2023, me impakt buxhetor 0 (zero) lekë, është i papërdorshëm. Qartësojmë gjithashtu se medikamenti FEIBA, nuk është kemiopreparat._
QSU ‘Nënë Tereza’, mbetet e hapur për qartësimin e çdo pretendimi *siç u deklarua edhe në Komision parlamentar* si dhe për transparencën e nevojshme që i shërben besimit mjek / pacient.
Për ilaçet e skaduara ka patur edhe debate në komisionin e Shëndetësisë ditë më parë mes deputetes Voshi dhe drejtoreshës së Farmacisë në QSUT, Mirela Rexhepi. Kjo e fundit mohoi që akuzat e deputetes së opozitës të ishin të vërteta duke argumentuar se një gjë e tillë nuk është e mundur pasi çdo veprim për barnat kryhet online. Versus.al
