Që të dalësh nga Kukësi duhet ‘të kapësh veshin e majtë me dorën e djathtë’. Mëngjesin e sotëm, kushdo që është nisur drejt Tiranës dhe ka tentuar të hyjë në Rrugën e Kombit ka hasur në disa barriera guri të vendosura në hyrje të urës së vjetër të këtij qyteti. Asnjë njoftim, asnjë arsye. Të gjitha makinat janë detyruar të kthehen mbrapsht për të kaluar nga rrethrrotullimi i fshatit Gostil, tek ura e re e ndërtuar së fundmi e cila ka vetëm një funksion, kalimin ‘pa prekur’ qytetin të udhëtarëve që duan të ikin drejt Kosovës. Një ecajake rreth 6 km që çdo pasagjer e drejtues e ka provuar gjatë ditës së sotme.
Qytetarët shprehen mjaft të irrituar me barrikadat e vendosura në dalje të Kukësit, pasi kjo gjë i pengon të shkojnë në punë apo të kryejnë nevoja të jetës së përditshme. Sepse tashmë do u duhet që për çdo herë që nisen drejt Tiranës apo kthehen në qytet të përshkrojnë së pari rrethrrotullimin e fshatit Gostil.
“Mirëmëngjesi! Dal sot (tani) si gjithnjë në mëngjes me mendjen + për punën dhe jetesën në tërësi !! Po “KËTA” ta SHPIFIN jetesën; të bëjnë BLLOK edhe të detyrojnë të kthehesh mbrapsht; të shkosh njëherë në GOSTIL, e më pas të ikësh në Tiranë!!! V.O Kjo s’ka lidhje me politikën por me kafshët me kokë njeriu që na privojnë jetesën në qytetin tonë !!! S’ka më turp s’di ç’emër ti vë.”- shprehet një prej qytetarëve në rrjetin e tij social, ku edhe shumë qytetarë të tjerë kanë shprehur indinjatën e tyre për bllokimin e rrugës.
I pyetur në lidhje me këtë çështje drejtori i ARRSH, Gentian Gjyli u shpreh për Versus.al se situata në Kukës është jashtë kompetencave të tij, pasi ‘në mes’ është kontrata koncesionare.
“Jam në dijeni, po merremi për ta zgjidhur", u shpreh ai për Versus.al.
Por a mund ta ketë kaq liri një koncesionar, aq sa të vendosë pa u konsultuar së pari me autoritetet dhe së dyti me komunitetin të cilit ia kufizon lëvizjen brenda natës, bazuar në vendimmarrje dhe interesa ‘të paqarta’?!
Ura e Re e Kukësit u ndërtua me qëllim lehtësimin e qarkullimit të fluksit të automjeteve që vinin nga Kosova për pushime në vendin tonë, por po rezulton si telash për banorët e zonës.
Një situatë e ngjashme që ka shkaktuar paqartësi tek qarkullimi i qytetarëve me automjete, është krijuar dhe ditën e djeshme në rrugën e sapoinaguruar Thumanë-Kashar, ku pati bllokime po njësoj me blloqe betoni në rrugën dytësore. 'Gojët e liga' thanë se kjo po bëhej që të gjithë të kalonin nga tolli me pagesë i koncesionarit... Koncesionari, ky ‘personazh’ legjendash që na e than burimin, sa herë ti teket./ Versus.al
