Fier- Luiz Ejlli, këngëtari dhe ish-banori i Big Brother VIP 2, është dënuar me 1 vit burg nga gjykata e Fierit nën akuzën të kryerjes së veprës penale “falsifikim dokumentesh” gjatë periudhës që punonte si noter.
Bëhet fjalë për një deklaratë noteriale të vitit 2022 të cilën i dënuari për prostitucion Fatmir Abdurrahmani e ka paraqitur në prokurori për të justifikuar pasuritë e tij të sekuestruara në 2021-in nga prokuroria e Lushnjës nën dyshimin se janë ngritur mbi veprimtari kriminale.
Luiz Ejllit i ishte hequr licensa nga Ministria e Drejtësisë por pavarësisht kësaj, ai ka falsifikuar deklaratën noteriale me të dhëna të pavërteta, e cila më pas është dorëzuar në prokurori nga personi nën hetim Fatmir Abdurrahmani i cili kërkonte heqjen e sekuestros së pasurive të tij.
Deklarata e falsifikuar në përmbajtje, mbante nënshkrimin e Luiz Ejllit. Në arkivën e akteve noteriale të hartuara prej ish-noterit me të dhënat e deklaratës së falsifikuar, ekzistonte edhe një tjetër deklaratë e 2015-ës me palë të ndryshme. Ndërkohë, klienti i tij asokohe Fatmir Abdurrahmani është dënuar nga gjykata e Fierit me 18 muaj burg nën akuzën e falsifikimit të dokumenteve kryer në bashkëpunim.
Skema e përdorur për deklaratën e falsifikuar:
Më 25 shkurt 2022, Fatmir Abdurrahmani ka paraqitur në prokurori deklaratën noteriale e cila sipas tij, ishte bërë te zyra noteriale e Luiz Ejllit më datë 16 dhjetor 2015 dhe mbante të dhënat si në faximile “nr 663 Rep, Nr 213 Kol datë 16.12.2015”.
Kjo deklaratë sipas prokurorisë, kishte përmbajtjen e marrjes së një huaje në dy këste nga 2008-2015 prej 151 mijë euro dhe 2011-2015 prej 60 mijë euro, para të cilat bashkëshortja Abdurrahmanit, i kishte marrë për të shlyer një kredi. E pikërisht kjo deklaratë s’ishte gjendur në arkivat e Ministrisë së Drejtësisë në përgjigje të kërkesave për informacion duke dalë në përfundimin se deklarata noteriale përmbante të dhëna të falsifikuara dhe të pavërteta me qëllim justifikimin e pasurive që i ishin sekuestruar Abdurrahmanit në vitin 2021. Versus.al
