Autoritetet hetimore në Pogradec kanë zbardhur detaje të reja lidhur me rastin e përdhunimit të një 12-vjeçareje.
Analiza e ADN-së ka përputhur materialin gjenetik të fetusit me të dyshuarin, një 67-vjeçar të identifikuar si Rrushan Selko, i cili ka lidhje familjare me familjen e vajzës.
Sipas burimeve hetimore, e mitura ka dhënë deklarim para psikologut, duke treguar për kërcënimet e vazhdueshme që i janë bërë për të mos bërë publike ngjarjen. Familjarët janë marrë disa herë në pyetje, ndërsa hetuesit po dokumentojnë çdo detaj të rastit.
Autoritetet kanë theksuar se trajtimi i çështjes po bëhet me prioritet maksimal, për të garantuar zbardhjen e plotë të ngjarjes dhe mbështetjen mjekësore dhe psikologjike për vajzën. Mjekët vendosën që e mitura të kryente abort për shkak të problemeve shëndetësore dhe moshës së saj.
Rasti i rëndë u zbulua në Pogradec dhe u bë publik më 30 dhjetor, ndërsa hetimet nisën menjëherë pas konfirmimit të shtatzënisë, e cila në atë kohë ishte rreth 22 javëshe./Versus.al
