Një ngjarje e pazakontë dhe shqetësuese është denoncuar së fundmi nga një grup vajzash që kishin shkuar për piknik në zonën e Malit të Dajtit. Ato kanë dërguar pamje dhe një mesazh denoncues në redaksinë e “JOQ Albania”, duke pretenduar se kanë zbuluar një varr të freskët, në të cilin, sipas tyre, mund të ndodhej trupi i një fëmije.
Sipas dëshmisë së vajzave, varri ishte i vendosur pranë fillimit të pyllit, shumë afër majës së malit. Ato raportojnë se mbi varr ishte vendosur një kapele e pastër dhe e re, çka, sipas tyre, është një tregues i mundshëm se bëhet fjalë për një varrim të kohëve të fundit.
“Sot dolëm për piknik në Malin e Dajtit dhe kemi gjetur një varr. Brenda tij ndodhej një fëmijë. Mbi varr ishte një kapele dhe dukej se ishte i freskët, pasi kapelja ishte e re dhe e pastër,” – thuhet në denoncim.
Po ashtu, sipas tyre, një pjesë e varrit dukej e gërmuar, e dyshohet se mund të jetë prekur nga kafshë të egra, gjë që e ka bërë edhe më të dukshëm për kalimtarët.
Autoritetet ende nuk kanë reaguar
Ngjarja ka shkaktuar shqetësim publik dhe ngritur pyetje serioze në lidhje me mundësinë e një rasti të paregjistruar, i cili mund të përfshijë elementë penalë apo nevojë për ndërhyrje të menjëhershme nga autoritetet.
Deri më tani, nuk ka një reagim zyrtar nga Policia e Shtetit apo autoritetet lokale në lidhje me këtë raportim. Verifikimi në terren është i domosdoshëm, për të sqaruar nëse bëhet fjalë për një varr të dokumentuar, një praktikë rituale të panjohur, apo një rast të rëndë penal. /Versus.al/
