Avokatët e mbrojtjes së ish-krerëve të Ushtrisë Çlirimtare të Kosovës kanë reaguar ashpër ndaj këmbënguljes së Prokurorisë së Hagës për të mos i liruar klientët e tyre nga paraburgimi, duke e konsideruar këtë një shkelje të rëndë të të drejtave të njeriut dhe prezumimit të pafajësisë.
Në parashtresën e fundit, mbrojtja e Jakup Krasniqit argumenton se ai është mbajtur në paraburgim për katër vjet e gjashtë muaj, pa një vendim përfundimtar gjyqësor. Avokatja e tij thekson se kjo situatë përbën një “dënim paraprak” dhe është në kundërshtim me standardet ndërkombëtare të drejtësisë.
Sipas mbrojtjes, përfundimi i dëshmive të Prokurorisë dhe dorëzimi i të gjitha provave e bën të panevojshëm vazhdimin e ndalimit. “Nuk ekziston më asnjë rrezik konkret që Krasniqi të ndikojë mbi dëshmitarët,” thuhet në dokument.
Mbrojtja ngre shqetësime edhe për gjendjen shëndetësore dhe moshën e Krasniqit, tashmë 74 vjeç, duke theksuar se izolimi i zgjatur po ndikon në aftësinë e tij për të ndjekur dhe kontribuar në mbrojtjen e vet. Ajo propozon zëvendësimin e paraburgimit me arrest shtëpiak, duke ofruar 7 masa sigurie konkrete që ai është i gatshëm të respektojë.
Kritika të ngjashme janë bërë edhe nga mbrojtja e Kadri Veselit dhe Rexhep Selimit, të cilët pretendojnë se Prokuroria po e përdor paraburgimin si mjet presioni, pa sjellë prova të reja që justifikojnë vazhdimin e ndalimit.
Avokatët kërkojnë që Gjykata të vendosë mbi lirimin e përkohshëm, duke respektuar të drejtat themelore të të akuzuarve dhe duke shmangur çdo perceptim për paragjykim në proces. /Versus.al/
