Ditën e sotme, Instituti i Mjekësisë Ligjore përfundoi ekspertimin mjeko-ligjor për vdekjen e 42 vjeçarit Egli Proga më 10 gusht në një lokal në Pogradec.
Akt-ekspertimi përshkruan dëmtimet e konstatuara në trupin e viktimës, konkretisht në ballë, hundë, vesh, në faqe dhe në supin e majtë. Këto dëmtime dyshohet se janë shkaktuar nga goditjet me grushte nga ana e Denis Meçes i cili mbahet i arrestuar nën akuzën e vrasjes nga pakujdesia, akuzë e ndryshuar nga ajo e mëparshme “vrasje me dashje”.
Shkaku i vdekjes së 42 vjeçarit mësohet të ketë qenë hemorragjia e pësuar në cipën e trurit dhe hemorragjia në indin trunor që i është shkaktuar edhe nga goditjet në makinë ku i është përplasur koka disa herë.
Në mostrën e gjakut të viktimës u zbulua prani e alkoolit etilik në vlerën mesatare 2.82 g/L.
Tashmë akt-ekspertimi i është dërguar prokurorisë së Korçës që po vijon hetimet mbi ngjarjen e rëndë që tronditi opinionin publik për shkak të dyshimeve të ngritura ndaj veprimeve hetimore të policisë.
Fillimisht ngjarja u raportua si aksidentale, rrëzim i një personi të alkoolizuar. Por më pas u zbuluan detaje të tjera të cilat tregonin se 42 vjeçari Egli Proga, baba i 2 fëmijëve ishte dhunuar për vdekje nga Denis Meçe. Ky i fundit deklaroi në polici se nuk kishte dashur ta vriste Progën. Ndërsa për ngjarjen u arrestuan edhe tre persona Voltan Shkulaku, Leonidha Guçe, Arjan Manellari, për të cilët u caktua masa e sigurisë “detyrim paraqitje” nën akuzën e moskallëzimit të krimit. Versus.al
