Një 22-vjeçar ka rënë në prangat e Policisë së Shtetit në Tiranë, pas një operacioni të koduar “Again”, duke zbuluar një skemë të përsëritur vjedhjesh dhe shkelje të hapur të masës së sigurisë.
Sipas burimeve zyrtare, shtetasi K. V., banues në zonën e Astirit, kishte thyer masën “arrest në shtëpi”, e caktuar më herët për vjedhje, dhe kishte dalë në terren për të vijuar aktivitetin e tij të paligjshëm.
Gjatë ndërhyrjes, shërbimet e Komisariatit Nr. 6 në bashkëpunim me forcat “Shqiponja” i kanë bërë shenjë ndalimi motomjetit që drejtonte i riu, por ai ka refuzuar t’i bindet urdhrit të policisë, duke u larguar me shpejtësi dhe duke tentuar t’i shpëtojë arrestimit.
Pas një ndjekjeje dinamike në rrugët e kryeqytetit, efektivët kanë arritur ta neutralizojnë dhe ta vënë në pranga.
Hetimet paraprake zbulojnë se 22-vjeçari dyshohet të jetë autor i të paktën dy vjedhjeve në banesa, të kryera në datat 22 dhe 23 prill 2026, ku ka marrë shuma parash. Ndërkohë, policia po vijon punën për të dokumentuar raste të tjera të mundshme ku ai mund të jetë i përfshirë.
Materialet procedurale i janë referuar Prokurorisë për veprime të mëtejshme, ndërsa rasti ngre edhe një herë shqetësimin mbi shkeljen e masave të sigurisë dhe rikthimin në aktivitet kriminal.
