Ish-kreu i ARRSH Dashamir Xhika, është paraqitur mëngjesin e sotëm në SPAK. Burime bëjnë me dije se do të merret në pyetje nga prokurorët e posaçëm lidhur me disa procedura tenderimi të firmosura gjatë kohës kur ai drejtonte Autoritetin Rrugor Shqiptar mes viteve 2013-2017.
“Gjithmonë për një procedurë të kryer gjatë kohës që kam qenë në detyrë”- tha Xhika para gazetarëve duke mos dhënë detaje të tjera dhe duke mohuar që të kishte lidhje me rrugën Tiranë-Elbasan.
Kjo është hera e dytë që Xhika paraqitet në SPAK, pasi herën e parë ishte 14 maji i vitit të kaluar kur qëndroi për rreth 40 minuta në ambientet e SPAK. Në dalje ai tha për gazetarët se ishte pyetur si person në dijeni lidhur me një procedurë tenderuese gjatë kohës që drejtonte institucionin.
Në 2018-ën Xhika së bashku me ish-kreun e ARRSH Andi Tomën u arrestuan me urdhër të Prokurorisë nën akuzën se kishin kryer abuzime me tenderin për rrugën Gjinar-Elbasan dhe dëmet përllogariteshin deri në vlerën e 5 milionë eurove. Ndaj tij ka dhe një tjetër denoncim të bërë nga ish-ministri i Infrastrukturës Damian Gjiknuri për shkelje me tenderin e rrugës Tiranë-Ebasan. Versus.al
