Një shtetas shqiptar është ndaluar nga autoritetet kufitare kroate, pasi tentoi të kalonte kufirin me 702.435 euro të padeklaruara, të cilat i kishte fshehur brenda automjetit që drejtonte.
Sipas autoriteteve doganore dhe policore në Kroaci, shqiptari nuk kishte deklaruar shumën, as në mënyrë të shkruar dhe as elektronike, siç kërkohet nga legjislacioni kroat dhe rregulloret e Bashkimit Evropian për lëvizjen e kapitalit.
Kontrolli fizik i automjetit ka zbuluar sasinë e konsiderueshme të parave, të cilat ishin fshehur në vende të modifikuara me kujdes, në përpjekje për të shmangur zbulimin nga skaneri apo inspektimi vizual.
Në pranga, në pritje të hetimeve
Pas sekuestrimit të shumës në vendngjarje, shoferi shqiptar është arrestuar menjëherë dhe është dërguar në paraburgim, nën akuzën për kontrabandë financiare, një vepër penale e parashikuar në ligjet kroate.
Aktualisht ai ndodhet në pritje të hetimeve të mëtejshme dhe përballje me autoritetet gjyqësore. Paratë janë depozituar në një llogari të përkohshme të administruar nga shteti, deri në përfundim të procesit hetimor.
