Gjykata e Fierit shtyu seancën e planifikuar për t'u mbajtur sot për Fredi Belerin mbi kërkesën e tij për lirim me kusht nga dënimi prej 2 vitesh burg i dhënë nga GJKKO për korrupsionin në zgjedhjet lokale të 14 majit në Himarë.
Beleri doli nga furgoni i policisë me pranga në duar, ndërsa u shoqërua nga policët drejt gjykatës. Dy seancat e mëparshme ku Beleri kërkonte lirimin me kusht u shtynë për shkak të mungesës së dokumentacionit të nevojshëm.
Beleri përfaqësohet nga avokati Geni Gjyzari, ndërsa gjyqtari i çështjes është Alfred Konomi.
Prokurori i çështjes është Oljana Gjergjefi, e cila do të përfaqësojë akuzën dhe do të paraqesë argumentet kundër lirimit me kusht të Belerit. Që pas kthimit nga Brukseli ku u betua si eurodeputet i Greqisë në Parlamentin Europian, Beleri u shpreh për mediat se synonte të lirohej me kusht. Versus.al
