Një 32-vjeçar është vënë në pranga nga Policia e Durrësit gjatë një operacioni të koduar “Mesnata”, pasi lëvizte me automjet i armatosur dhe pa leje drejtimi.
Sipas policisë, Enea Kiptiu u ndalua në lagjen nr. 18 të qytetit, ndërsa gjatë kontrollit fizik iu gjet në çantë një armë zjarri pistoletë dhe municion luftarak.
Gjithashtu, nga verifikimet rezultoi se ai drejtonte automjetin pa leje drejtimi.
Më tej, gjatë kontrollit në banesën e tij u sekuestrua edhe një sasi tjetër municioni.
Në përfundim të veprimeve procedurale, 32-vjeçari u arrestua në flagrancë dhe materialet iu referuan Prokurorisë së Durrësit për veprime të mëtejshme.
Njoftimi i policisë:
Durrës/Finalizohet operacioni i koduar “Mesnata”.
Lëvizte i armatosur me pistoletë, kapet në flagrancë dhe vihet në pranga 32-vjeçari.
Sekuestrohen arma e zjarrit pistoletë dhe municioni luftarak.
Shërbimet e Forcës së Posaçme “Shqiponja”, në vijim të punës për identifikimin dhe ndalimin e shtetasve që qarkullojnë me armë pa leje, bazuar edhe në informacionet e siguruara në rrugë operative, në bashkëpunim me Specialistët për Hetimin e Krimeve të Komisariatit të Policisë Durrës, organizuan dhe finalizuan operacionin policor të koduar “Mesnata”.
Gjatë operacionit, në lagjen nr. 18, u ndalua automjeti me drejtues shtetasin E. K.
Shërbimet e Policisë, gjatë kontrollit fizik, shtetasit E. K., në çantën marsup i gjetën 1 armë zjarri pistoletë, të cilën e posedonte pa leje, ndërsa gjatë kontrollit të banesës iu gjet edhe një sasi municioni luftarak.
Nga verifikimet e mëtejshme rezultoi se 32-vjeçari drejtonte automjetin pa leje drejtimi.
Në përfundim të veprimeve procedurale, u bë arrestimi në flagrancë i shtetasit E. K., 32 vjeç, banues në Durrës, për veprat penale “Mbajtja pa leje dhe prodhimi i armëve, armëve shpërthyese dhe i municionit” dhe “Drejtimi i automjeteve në mënyrë të parregullt”.
Materialet procedurale i kaluan Prokurorisë së Durrësit, për veprime të mëtejshme.
