Së shpejti, në Shëngjin dhe Gjadër të Lezhës do të mbërrijnë njëqind emigrantët e parë nga Italia. Qeveria italiane i ka dhënë dritën jeshile transferimit të emigrantëve nga Qendrat Italiane të Paraburgimit dhe Riatdhesimit drejt ambienteve në Shqipëri.
Kjo nismë është pjesë e marrëveshjes dypalëshe midis Romës dhe Tiranës për njohjen ekstraterritoriale dhe është pjesë e strategjisë së qeverisë Meloni për të zgjidhur emigracionin e paligjshëm.
Duke marrë parasysh se mesatarisht vetëm 50% e emigrantëve të ndaluar në qendrat e pritjes arrijnë të kthehen realisht në vendet e tyre, pritet një rritje e kostove për shkak të transportit të vazhdueshëm midis Italisë dhe Shqipërisë, pasi çdo emigrant i ndaluar duhet të shoqërohet nga dy policë.
Për të “qetësuar” Qeverinë shqiptare, Italia ka garantuar se nëpër qendra do të kalojnë vetëm emigrantët tashmë të destinuar për dëbim. Kjo metodë synon të shmangë problemet në Shqipëri.
Me transferimet e para në Shqipëri që priten që në fillim të javës së ardhshme, Italia po përgatitet të testojë një model që mund të bëhet një pionier për menaxhimin e flukseve të emigracionit në Europë.
