I shumëkërkuari i drejtësisë Suel Çela i cili është shpallur në kërkim që prej majit të vitit 2022 pas operacionit “Plumbi i Artë” ka ankimuar masën e sigurisë ‘arrest me burg’.
Edhe pse në arrati, Suel Çela i njohur si Marjus Lula, nëpërmjet avokatëve të tij ka paraqitur ankimimin kundër masës së sigurisë që u lëshua ndaj tij pas rrëfimit të vrasësit me pagesë Nuredin Dumani.
Në dëshminë e dhënë prej Dumanit i cili u kthye në të penduar të drejtësisë, Suel Çela kishte porositur vrasjen e biznesmenit Lulzim Masha dhe të Elton Kilës, ngjarje të mbetura në tentativë.
Ndaj Suel Çelës u lëshua tjetër masë sigurie “arrest me burg” pas operacionit të zhvilluar së fundmi nga SPAK ndaj bandës së tij ku ishin të përfshirë edhe ish-gjyqtarë të gjykatës së Elbasanit. Në detajet e publikuara nga dosja për Suel Çelën, u zbulua sesi i shumëkërkuari kishte nën kontroll gjyqtarët e Elbasanit dhe mbante kontakte të rregullta me Pajtime Fetahun e cila e ndihmonte t’i shpëtonte drejtësisë.
Suel Çela shfaqet si i përfshirë në atentate dhe në trafik ndërkombëtar droge nga Amerika Latine. Përveç këtyre veprave penale, ai ndikonte tek gjyqtarët në mënyrë që kundërshtarët e tij të dënoheshin sa më ashpër nga drejtësia. Ndërsa për përfshirje në grupin e tij, SPAK lëshoi masa sigurie “detyrim paraqitje” për gazetarët Artan Hoxha dhe Elton Qyno të cilët dyshohet se të ndikuar nga Çela kanë publikuar lajme për kundërshtarët e tij.
Pavarësisht se masën e sigurisë e ankimon nga arratia, ende nuk ka asnjë gjurmë apo të dhënë mbi Suel Çelën i cili prej vitit 2022 mbetet një prej personazheve më të kërkuar të botës së krimit. Versus.al
