Mbi 4000 bimë marijuanë, 42 kilogramë sytha marijuane, 80 kg hashash dhe 60 gramë drogë sintetike e llojit MDMA është bilanci i një operacioni të zhvilluar nga autoritetet spanjolle kundër mafies shqiptare të drogës me bazë në Katalonja. Në pranga janë vënë gjithsej 18 persona, 11 prej të cilëve konsiderohen si drejtues të organizatës kriminale.
Sipas policisë spanjolle grupi kriminal kishte ngritur 6 plantacione me kanabis, në total 4 mijë rrënjë kanabis sativa.
Hetimi ka nisur kur agjentët mësuan për ekzistencën e një grupi hajdutësh të specializuar në kryerjen e grabitjeve me dhunë nëpër banesa. Ky grup çoi hetuesit drejt organizatës shqiptare të dedikuar për kultivimin dhe trafikun masiv të marijuanës.
Mediat raportojnë se 11 bosët janë burgosur, ndërsa pjesa tjetër e të arrestuarve, si kopshtarët e plantacioneve janë liruar me akuza në pritje të gjyqit.
Po ashtu u sekuestruan edhe 13.000 euro. Me arrestimet dhe burgosjet e drejtuesve të organizatës, organizata konsiderohet e shkatërruar.
