Policia e Kosovës, në bashkëpunim me Agjencinë e Inteligjencës së Kosovës (AKI) dhe Prokurorinë, ka ndërmarrë sot një operacion të gjerë në fshatin Vallaq, komuna e Zveçanit, i cili është zhvilluar nën monitorimin e KFOR-it dhe EULEX-it.
Gjatë bastisjes, autoritetet kanë zbuluar një arsenal armësh të rënda, përfshirë raketahedhës dore (zolla), granata dore, tronblonë, armë automatike dhe municion të llojeve të ndryshme. Sasia e armatimit, sipas Policisë, do të mjaftonte për të furnizuar një njësi të tërë terroriste.
Sipas ministrit të Punëve të Brendshme në detyrë, Xhelal Sveçla, armët janë gjetur në një objekt në pronësi të politikanit serb Aleksandar Arsenijeviç, një figurë e njohur në politikën lokale të veriut të Kosovës.
“Sot kemi goditur një strukturë që paraqet rrezik të drejtpërdrejtë për sigurinë dhe stabilitetin e vendit tonë. Krimi nuk mund të fshihet kurrë, pavarësisht petkut që vesh,” – u shpreh Sveçla në një deklaratë publike.
Ai shtoi se operacionet për çrrënjosjen e grupeve kriminale dhe elementëve të lidhur me strukturat e Serbisë do të vazhdojnë pa kompromis. /Versus.al/
