Një vendim gjykate mund të zhbëjë konkursin për gradën “Drejtues”, të zhvilluar kur policia drejtohej nga Muhamet Rrumbullaku dhe ministër i brendshëm ishte Taulant Balla. Kjo do të rrezikonte futjen në kolaps të gjithë procedurës së gradave në radhët e uniformave blu.
Një vendim në favor të palës paditëse madje do të vinte në pikepyetje edhe fatin e Ilir Prodës, i sapozgjedhur në krye të Kopulës së Policisë së Shtetit. Ky i fundit gradën “drejtues” e mori nga ky konkurs i dërguar tashmë në gjykatë, para se të merrte gradën “ drejtues madhor” me vendim qeverie.
Paditësi Kryekomisar Pal Marku kërkon anulimin e urdhërit me pretendimin se mënyra se si u procedua për gradën “Drejtues”, nxori në pah shumë paligjshmëri. Pavarësisht rezultatit me shkrim ndaj tij dhe disa kolegëve, sipas kryekomisarit, Komisioni i Vlerësimit iu dha shumë pak pikë qëllimisht në testin me gojë. Po ashtu sipas Markut, ish-kryepolici Rrumbullaku ndryshoi rregullat dhe kriteret e vlerësimit në mënyrë të paligjshme, ndërsa komisioni apelimit nuk ka marrë parasysh asnjë kontestim nga kryekomisarët.
“Pas ankimit administrativ të bërë nga ana ime, drejtuar Komisionit të Apelimit për gradën “Drejtues”, nga ky Komision nuk jam thirrur për t’u informuar, dëgjuar dhe mbrojtur, në lidhje me argumentet e paraqitura për vlerësimin administrativ dhe të performancës, nuk më është dhënë mundësia për të paraqitur mendime e shpjegime shtesë para Komisionit, nuk ka patur asnjë lloj komunikimi me mua lidhur me ankimin e paraqitur, por dhe në përgjigjen e komisionit, nuk ka patur arsyetim apo argumentim për vlerësimin e bërë ndaj meje, por thjeshtë na është dhënë përgjigje në grup”.
Duket se pas ngritjes së kësaj padie, një numër i i konsiderueshëm i kolegëve të Markut, kanë patur interes të përfshihen si palë në gjykim, me të njëjtat pretendime.
Rrumbullaku
Procesi i gradave në polici ishte bllokuar për 5 vite me radhë, nga nëntori i vitit 2018, ndaj njoftimi i ish-ministrit, Taulant Balla, për hapjen e konkurseve për fitimin e gradës, më 26 nëntor 2023, zgjoi shpresat për një numër të konsiderueshëm oficerësh të karrierës. Urdhri i Drejtorit të Përgjithshëm, Muhamet Rrumbullaku, datë 16.11.2023, që përcaktonte 572 vende vakante sipas gradave, mes të cilëve 12 për “Drejtues i Parë”, 40 për “Drejtues”, 200 për “Kryekomisar” dhe 320 për “Komisar”. Urdhri kishte detajuar edhe metodologjinë e vlerësimit, sipas një skeme, ku vlerësimi administrativ kuotohej deri në 20 pikë, ai i performancës, deri në 40 pikë, testit me shkrim e ushtrime, deri në 20 pikë dhe në fund intervista me gojë, 20 pikë. Kur aplikimet u mbyllën dhe konkursi ishte në vazhdim e sipër, krejt papritur del një urdhër i dytë, zyrtar, që ndryshoi kriteret. Skema e re e vlerësimit i shtonte pikë intervistës me gojë dhe i zbriste pikë performancës dhe dosjes administrative. Bëhet fjalë për urdhrin nr. 270, të datës 19 shkurt 2024, të ish-Drejtorit të Përgjithshëm, Muhamet Rrumbullaku, që doli dy muaj pas kalimit të datës limit për publikimin e rezultateve të konkursit, që ndryshoi rregullat e lojës, duke urdhëruar metodologji të ndryshme vlerësimi.
Sipas skemës së re, vlerësimi administrativ, nga 20 pikë, do të kishte vetëm 10 pikë, edhe vlerësimit profesional i ulej pesha, duke i lënë vetëm 30 pikë, ndërsa testimit me shkrim dhe intervistës me gojë i rritej pesha, duke i dhënë secilit nga 30 pikë, pra 60 në total. Një skemë e tillë ndërhynte në rezultatet e kualifikimit paraprak të konkursit.
