Të enjten pritet të nisin zyrtarisht transferimet e para të emigrantëve nga Italia drejt Shqipërisë, në kuadër të marrëveshjes mes dy qeverive për ngritjen e një Qendre të Paraburgimit për Riatdhesimin në Gjadër.
Burime nga autoritetet portuale shqiptare bëjnë me dije se anija e parë, me 15 emigrantë të nisur nga Brindizi, pritet të mbërrijë në portin e Shëngjinit rreth orës 15:00 të ditës së enjte. Ndërkohë, një anije e dytë me 25 emigrantë të tjerë parashikohet të mbërrijë po atë ditë, rreth orës 19:00.
Në total, priten 40 persona, një numër që përkon me kapacitetin aktual të strukturës së ndërtuar në kampin e Gjadrit, tashmë e konvertuar me dekret të qeverisë italiane në CRP.
Transferimi i emigrantëve vjen si pjesë e zbatimit të marrëveshjes dypalëshe për menaxhimin e flukseve migratore, një proces që ka ngjallur debat si në Shqipëri, ashtu edhe në Itali. /Versus.al/
