Ditën e sotme autostrada Tiranë-Durrës është mbuluar nga shtëllunga tymi, pasi një autobot i "Gega Oil" ka shpërthyer në flakë.
Shpërthimi ka ndodhur teksa autoboti po furnizonte një nga pikat e karburantit e kësaj kompanie.
Të lënduar nga shpërthimi kanë mbetur dy punonjësit e kësaj pike karburanti të cilët janë transportuar në spital për ndihmë mjekësore.
Ndërkohë zjarrfikëset kanë mbërritur menjëherë në vendngjarje dhe fatmirësisht situate është nën kontroll dhe flakët janë shuar.
Grupi hetimor ndodhet në vendngjarje dhe po punon për zbardhjen e rrethanave të ngjarjes.
Njoftimi i policisë Durrës:
Rreth orës 14:00, në autostradën Durrës-Tiranë, në një pikë karburanti, është përfshirë nga flakët një automjet që transporton karburant. Për pasojë janë lënduar shtetasit Xh.K., 20 vjeç, banues në Kamëz dhe shtetasi E.P., rreth 35-vjeç, (të dy punonjës të karburantit), të cilët janë trasportuar në spital për ndihmë mjekësore.
Ndërhyrja në kohë e shërbimeve zjarrfikëse dhe Policisë ka izoluar flakët duke shmangur përfshirjen nga zjarri të çisternave me karburant. Shërbimet e Policisë evakuan në kohë, personat e tjerë që ndodheshin rreth zonës në rrezik.
Zjarri është shuar tërësisht dhe lëvizja e mjeteve në të dy krahët e autostradës po vijon normalisht./ Versus.al
