Policia e Spanjës ka goditur një tjetër celulë të një rrjeti të organizuar kriminal shqiptar, i përfshirë në trafikim të qenieve njerëzore, falsifikim dokumentesh, si dhe aktivitete të tjera kriminale si trafik armësh, droge dhe grabitje.
Operacioni i përbashkët me Policinë Shqiptare, EUROPOL dhe EUROJUST, pjesë e një hetimi që zgjat prej vitit 2019, ka përfunduar me 26 arrestime dhe 47 kontrolle të kryera, përfshirë një në Tarragona, Spanjë, dhe të tjerat në Shqipëri. Ndërkohë, në Kosovë është çmontuar një laborator për falsifikim dokumentesh që shërbente për organizatat kriminale.
Një rrjet i specializuar
Sipas autoriteteve spanjolle, organizata kriminale kishte shtrirje në disa vende, përfshirë Spanjën, Shqipërinë, Kosovën, Mbretërinë e Bashkuar, Portugalinë, Kanadanë dhe Gjermaninë. Anëtarët e saj transportonin emigrantë shqiptarë me furgonë nga Shqipëria drejt Barcelonës dhe Tarragonës, duke përdorur si korridore Serbinë dhe Hungarinë.
Ata përdornin metoda të sofistikuara fshehjeje, jo vetëm për njerëzit, por edhe për drogë, armë, municione dhe bizhuteri të vjedhura. Pasi mbërrinin në Spanjë, emigrantëve u siguroheshin dokumente false identifikimi të vendeve të zonës Shengen, që më pas përdoreshin për të fluturuar në Mbretërinë e Bashkuar ose Irlandë.
Falsifikime të sofistikuara dhe transport strategjik
Hetuesit zbuluan dy mënyra të përdorura për transportin e emigrantëve:
1. Fluturime me dokumente false drejt vendeve si Irlanda apo MB.
2. Fluturime tranziti përmes vendeve pa viza, ku pasagjerët përdornin dokumentet e tyre reale për të kaluar kontrollin, përpara se të ndryshonin destinacionin.Në shumë raste, anëtarët e organizatës ishin persona të rrezikshëm, të përfshirë më parë në shkëmbime zjarri dhe pazare droge. Në një rast, autoritetet sekuestruan 13 armë zjarri, 3,000 fishekë dhe 160 bizhuteri të vjedhura, si dhe pajisje për bllokimin e telefonave.
Përmasat e aktivitetit janë tronditëse: vetëm në aeroportet Barajas dhe El Prat të Spanjës janë arrestuar 274 qytetarë shqiptarë për falsifikim dokumentesh në vitet 2023-2024. Ndërkohë, në Gjermani, për të njëjtën periudhë janë arrestuar 77 shqiptarë në të gjitha aeroportet për të njëjtën vepër penale.
Faza e fundit e këtij operacioni ndërkombëtar shënon fazën e shtatë të një hetimi që ka sjellë gjithsej 82 arrestime në vende të ndryshme evropiane. Për herë të parë, Spanja ka dërguar oficerë në Shqipëri për të asistuar drejtpërdrejt në arrestimet dhe ndalimet e të dyshuarve.
Kjo goditje e gjerë tregon për rrezikun e shtuar të rrjeteve kriminale shqiptare të përfshira në trafik ndërkombëtar dhe domosdoshmërinë për bashkëpunim të ngushtë mes vendeve evropiane në luftën kundër krimit të organizuar. /Versus.al/
