Një grua 59-vjeçare me origjinë shqiptare ka humbur jetën në mënyrë tragjike teksa ishte në vendin e saj të punës në një hotel në zonën turistike të Oias, në Santorini.
Sipas raportimeve nga mediat greke, ngjarja ka ndodhur kur një shtrat i veçantë, i montuar në mur, është shkëputur papritur dhe ka rënë mbi kokën e saj. Goditja fatale i shkaktoi thyerje të qafës, duke i marrë jetën në vend.
Pavarësisht se shërbimet e urgjencës mbërritën menjëherë në vendngjarje, mjekët konstatuan se viktima kishte ndërruar jetë para mbërritjes së tyre.
Autoritetet greke kanë arrestuar pronarin e hotelit dhe po e marrin në pyetje lidhur me standardet e sigurisë në ambientet e punës. Hetimet po vazhdojnë për të përcaktuar përgjegjësinë dhe shkaqet e sakta të aksidentit tragjik.
Ngjarja ka tronditur komunitetin lokal dhe ka rikthyer në vëmendje çështjen e kushteve të sigurisë për punëtorët sezonalë dhe emigrantët që punojnë në sektorin turistik në Greqi. /Versus.al/
