Sezoni turistik përgjatë këtij viti po trumbetohet nga qeveria si një sukses, duke publikuar herë pas here shifra të cilat krahasuar me vitin e kaluar rezultojnë të jenë më të larta. Madje kryeministri Edi Rama ka qenë tepër aktiv duke publikuar vazhdimisht të dhëna për hyrjen e pasagjerëve nga Rinasi.
Sa i takon ‘kritikëve’ të cilët pyesin për përfitimin e qytetarëve nga numri i lartë i pasagjerëve, kryeministri ua ka dhënë përgjigjien duke argumentuar se çdo shpenzim që ata kryejnë në vend përkthehet në taksë që përfundon në buxhetin e shtetit.
Por sesa ky buxhet përdoret për t’u lehtësuar jetën qytetarëve është tjetër diskutim.
Në debatin për përfitimin e qytetarëve nga ky “bum” turistësh, lind natyrshëm pyetja edhe për kostot që u duhet të paguajnë banorëve të vendit për këtë fuks të madh turistësh. Përveç trafikut të mbingarkuar, tashmë një problem i madh është edhe ai i ujit, si në rastin e qarkut të Durrësit ku ka pasur mungesa të mëdha të furnizimit me ujë në ditët më të nxehta të verës.
Banorët në zonat periferike të qarkut kanë raportuar vazhdimisht në Versus.al për mungesat e furnizmit me ujë të pijshëm përgjatë ditës sa i takon periudhës së muajve, qershor, korrik deri në mesin e gushtit. Ata janë ankuar se gjatë kësaj periudhe, kanë furnizimi me ujë ka qenë shumë i kufizuar, vetëm 1 deri në 2 orë gjatë mëngjesit, në periudhën më kulminante të pikut të verës. Bëhet fjalë për banorë në njësinë administrative të Rrashbullit që ka një numër popullsie prej rreth 20 mijë personash.
Sa i takon këtyre shqetësimeve, Versus.al u interesua pranë institucionit të Ujësjellës Kanalizime Durrës me disa pyetje drejtuar zyrës për informacion. Sa i takon pretendimit të banorëve për mungesën e furnizimit me ujë në përgjigjien e UKD thuhet se ka pasur edhe interesim të qytetarëve përgjatë dative 24 dhe 25 korrik dhe u është shpjeguar se përgjatë atyre ditëve ka pasur probleme tubacionin kryesor të stacionit në Fushë-Kuqe.
Në përgjigjie pranohet gjthashtu se shkak për këtë furnizim të kufizuar me ujë të pijshëm është bërë edhe sezoni turistik për shkak të kërkesave të shtuara për ujë.
“Në datat 24 dhe 25 korrik 2024 një pjesë e banorëve të zonave në fjalë kanë ardhur pranë mjediseve të Ujësjellës Kanalizime Rajoni Durrës dhe janë pritur nga Kryeinxhinieri dhe Kryedispeçeri i Shoqërisë, të cilët ua kanë shpjeguar situatën e furnizimit me ujë. Ato ditë ka pasur një difekt në tubacionin kryesor që furnizon me ujë zonën në fjalë nga stacioni i Fushë Kuqes. Për këtë arsye ka pasur probleme në furnizimin me ujë, pasi depoja në Arapaj, e cila furnizon zonën Rrashbull dhe Ish Stacioni Zooteknik, nuk mbushej plotësisht me ujë për shkak të këtyre difekteve. Kanë qenë disa ditë që banorët e këtyre zonave janë furnizuar me 1-2 orë ujë, duke ndikuar për këtë edhe rritja e temperaturave, kohë kur burimet ujore pakësohen, rritja e madhe e kërkesës për ujë, duke shtuar këtu edhe sezonin turistik. Gjithsesi, zonat më problematike në këtë periudhë kohore kanë qenë disa banesa në pikat fundore, dhe jo të gjithë kanë qenë në këtë situate”- thuhet në përgjigjien e UKD.
Ndërsa sa i takon pyetjes së drejtuar nga Versus.al për mundësinë e një përzgjedhje në zonat e furnizimit me ujë të pijshëm, zyra e marrëdhënieve me publikun në UKD pretendon se nuk kemi të bëjmë me ndarje preferenciale.
“Në lidhje me atë që ju e quani "ndarje preferenciale", ju bëjmë me dije se e gjithë zona që UK Rajoni Durrës mbulon me shërbimin e furnizimit me ujë, ka një grafik të miratuar nga Drejtoria e UK Rajoni Durrës dhe sipas këtij grafiku qyteti i Durrësit furnizohet në disa lagje nga 2 orë në ditë deri në 24 orë në disa zona të veçanta. Nuk ka ndarje preferenciale, por në varësi të gjendjes së rrjetit të furnizimit me ujë dhe disatancës nga tubacioni i furnizimit me ujë apo depos së furnizimit, kemi edhe kohëzgjatjen e furnizimit”- thuhet në përgjigjie.
Ndërsa për furnizimin aktual të banorëve me ujë të pijshëm, UKD thotë se është rritur koha e furnizmit duke pranuar edhe faktin që turistët kanë ndikuar në këtë fakt.
“Aktualisht zona në fjalë furnizohet me 5-6 orë ujë në ditë dhe kjo lidhet pjesërisht me ikjen e turistëve, por edhe rënies së kërkesës për ujë në këtë periudhë të fundit të muajit gusht dhe fillim i shtatorit Gjatë ditëve në vijim furnizimi me ujë për zonat e mësipërme do të jetë i njëjtë, duke zbatuar grafikun dhe duke ndërhyrë në kohë në rast se do të ketë defekte në rrjetin e furnizimit”- përfundon përgjigjia e institucionit.
Pavarësisht përgjigjies së UKD për një defekt në stacionin e Fushë-Kuqes që sipas tyre ka shkaktuar probleme në furnizimin e rregullt me ujë, banorët janë shprehur jashtë kamerave për Versus.al se një situata ka qenë pothuajse e njëjtë edhe në vitin e kaluar, në kulmin e sezonit turistik, kishte ndërprerje drastike të furnizimit me ujë të pijshëm kryesisht në zonat periferike të njësisë administrative Rrashbull.
Për këtë investigim, Versus.al kontaktoi edhe institucionin e bashkisë së Durrësit duke qenë se një vit më parë në fushatë elektorale kryebashkiakja Emirjana Sako zotohej se një ndër prioritetet e saj ishte zbatimi i projektit me vlerë 61 mln euro për rikonstruksionin e rrjetit shpërndarës dhe rehabilitimin e sistemit të Fushëkuqes.
Për pyetjet e drejtuara, nëse ka pasur ankesa të banorëve apo veprime të ndërmarra nga bashkia e Durrësit për të zgjidhur problemin e mungesës së furnizimit me ujë të banorëve të zonave periferike gjatë ditëve më të nxehta, bashkia e Durrësit siç duket ka zgjedhur të mos përgjigjet pavarësisht zotimit të bërë një vit më parë nga kryebashkiakja Sako për zbatimin e projektit të mbështetur edhe nga Agjencia Franceze për Zhvillim që ka si qëllim: Sigurimin e furnizimit të vazhdueshëm 24 orë për zonën e qytetit; Ndarjen në zona të furnizimit me ujë, me qëllim kryerjen e bilancit të ujit; Reduktimin e humbjeve teknike në qytet; Reduktimin e humbjeve teknike në tubacionin ekzistues DN 700 të Fushë Kuqes; Reduktimin e ujit pa të ardhura; Përmirësimin e efiçencës së energjisë në stacionin e pompave në Fushë Kuqe.
Mëgjithë këtë projekt, sërish në këtë sezon turistik qytetarët e zonave periferike kanë raportuar mungesë të theksuar të furnizimit me ujë në interval 1-2 orësh gjatë gjithë ditës.
Sako është e besuara e kryeministrit Edi Rama si drejtuese politike e qarkut të Durrësit për zgjedhjet parlamentare që do të mbahen në 2025-ën. Por mbetet për t’u parë sesi kryebashkiakja do të dalë në terren për të kërkuar votën e banorëve të cilët në kulmin e nxehtësisë u furnizuan me ujë për intervalin kohor 1-2 orë në ditë ndërkohë që vetë Sako kishte premtuar një vit më parë përmirësimin e situatës. Versus.al
