Detaje të reja janë zbuluar për Françesk Shkambin, 44 vjeçarin që u vra të dielën me armë zjarri në restorantin e tij në Michigan. Ai rezulton të jetë kushëri me Elvis Shkambin, të riun e arrestuar për vrasjen e gjyqtarit Astrit Kalaja më 6 tetor, brenda sallës së gjyqit në Tiranë.
Françesk Shkambi ishte personi i cili pak javë më parë ndërmori një iniciativë për hapjen e një llogarie në “GoFundMe” për të mbledhur fonde në ndihmë të Elvis dhe Gjon Shkambit, duke u prezantuar si familjar i tyre.
Objektivi i llogarisë së hapur ishte për të siguruar të ardhurat që të paguante një avokat për të arrestuarit, ndërsa u grumbulluan mbi 9 mijë dollarë.
Mediat amerikane shkruajnë se Françesk Shkambi dhe personi që e vrau, njiheshin me njëri tjetrin dhe kishin patur konflikte të vazhdueshme. Megjithatë ende nuk janë bërë të ditura shkaqet e ngjarjes së rëndë. Dëshmitarët kanë deklaruar se autori 65 vjeçar e thirri Françesk Shkambin dhe sapo ky i fundit doli jashtë, e qëlloi me armë zjarri dhe u arratis.
Autori u vetëdorëzua në polici, ndërsa arma e zjarrit tip "pistoletë" ishte raportuar e vjedhur më herët. Versus.al
