Gjykata e Korçës ka lehtësuar masën e sigurisë për Leonidha Guçen dhe Denis Meçen, të arrestuar për vrasjen e Eglantin Progës në Pogradec.
Pas 15 muajsh në paraburgimin e Drenovës, tre ditë më parë gjykata vendosi t’i largojë nga qelia dhe t’i vendosë në “arrest shtëpie”, me argumentin se afatet ligjore të qëndrimit në paraburgim kanë skaduar.
Ndërkohë, Prokuroria e Korçës vijon hetimet dhe është ende në pritje të akt-ekspertimit, pasi një pjesë e pamjeve filmike të ngjarjes rezulton e fshirë.
Fillimisht dosja ishte dërguar për gjykim me disa të pandehur, por dëshmia e Denis Meçes në prokurori solli rikthimin e saj për rihetim.
Aktualisht hetuesit presin rezultatet e ekspertizës që po kryhet në një laborator kompjuterik në Itali, në përpjekje për rikuperimin e pamjeve të humbura dhe sqarimin e rolit të të dyshuarve.
Ngjarja e rëndë ndodhi të shtunën 10 gusht të vitit të kaluar në Pogradec, pranë vendit të njohur si agjencia.
Egli Proga u gjet pa ndjenja në rrugë dhe u dërguar me urgjencë në spital, ku humbi jetën.
Fillimisht u mendua se bëhej fjalë për ngjarje aksidentale, por më pas u zbulua se ai ishte rrahur për vdekje nga Denis Meçe, 29 vjeç./Versus.al
