Janë publikuar pamjet e dhunës brutale që dy motrat Antonela dhe Mariela Berisha kanë ushtruar ndaj të resë Klea Prenga në një lokal të Tiranës rreth 1 muaj më parë.
Në videon e publikuar shihet momenti kur dy motrat të dyja me kapele i afrohen Klea Prengës e cila ishte e kthyer me shpinë dhe e godasin me gotën e qelqit në fytyrë duke i lënë dëmtime të shumta. Më pas ka vazhduar përleshja mes dy motrave dhe të resë e cila përpiqej të kuptonte se çfarë po ndodhte në ato momente.
Të pranishmit, duken mjaft indiferentë ndërsa vetëm pak prej tyre kanë tentuar të shuajnë konfliktin e rëndë mes femrave.
Aktualisht Antonela dhe Mariela Berisha janë të shpallura në kërkim për dhunën brutale të shkaktuar ndaj Klea Prengës. Ndërsa dyshohet se i gjithë konflikti nisi për shkaqe xhelozie nga ana e Mariela Berishës e cila pretendonte se blogerja kishte ndërhyrë në marrëdhënien e saj me biznesmenin Miri Pepa. Prokuroria ka sekuestruar 2 automjetet e motrave Berisha, ndërsa sipas të dhënave të sistemit TIMS rezulton se ato nuk kanë dalë jashtë vendit dhe se fshihen në Shqipëri. Versus.al
