Xhemal Meta, 81 vjeç, humbi jetën në një mënyrë brutale, nga një goditje çnjerëzore me çekiç në kokë, pas një kafeje të pirë me fqinjin mëngjesin e 17 janarit të këtij vitit. Motivi? Vjedhja e parave për të paguar një mikrokredi, është përgjigjja tronditëse që ka dalë nga hetimet.
Isuf Hasa, një njeri që ka jetuar për vite të tëra si fqinj i Xhemalit, është tani i akuzuar për vrasjen me dashje. Prokuroria ka kaluar çështjen nga akuzat për vrasje në “vjedhje me pasojë vdekjen”, pasi zbardhja e ngjarjes ka bërë të qartë se motivi nuk ishte urrejtja, por një presion ekonomik që mbërtheu shpirtin e tij.
Në mëngjesin e 17 janarit të këtij viti, Isufi kishte nisur udhëtimin drejt vajzave të tij në Tiranë e Vorë. Megjithatë, rruga e tij e çoi në një drejtim tjetër, tek shtëpia e Xhemalit, një mik dhe fqinj prej më shumë se një dekade. Ata pinë një kafe së bashku, pa asnjë shenjë që mund të ndodhte një tragjedi.
Disa minuta pas kafenesë së qetë, një goditje e fuqishme në kokë e çoi Xhemalin nën dhe. Isuf Hasa, pasi mbylli jetën e fqinjit të tij, mori edhe portofolin e viktimës dhe u largua, duke pirë një kafe tjetër dhe një dopjo raki në kafenenë e fshatit, si një njeri që e kishte harruar atë që kishte bërë.
Hetimet zbuluan një ndjenjë të fshehur tek Isuf Hasa, të mbledhur gjatë viteve, ku Xhemali shpesh e ofendonte për jetën që bënte. “Nuk je burrë, qëndron 4 ditë pa ardhur në shtëpi”, kishte thënë Xhemali, një thënie që, sipas Isufit, ishte grumbulluar për të krijuar një barrë emocionale që nuk mund të mbahej më.
Nga ana tjetër, Isufi kishte një mikrokredi, ndaj pas vrasjes ai ka marrë dhe portofolin e viktimës. Në takimet me vajzat ai i ka lënë atyre shuma parash, 68 mijë lekë tek njëra dhe gati 120 mijë lekë te tjetra, të sekuestruara.
Njërën prej tyre, ai e ka porositur që për çdo muaj të shkonte dhe të bënte pagesa nga 15 mijë lekë për llogari të një mikrokredie të marrë prej tij në një institucion financiar.
Isuf Hasa, tani në duar të drejtësisë, pritet të përballet me një dënim të rëndë. Kodi penal parashikon një dënim nga 15 vjet deri në burgim të përjetshëm për krimin e kryer prej tij.
