Prej dy orësh, forcat zjarrfikëse kanë luftuar për shuarjen e zjarrit që ra në një sipërfaqe bimësie e shkurresh në Novoselë, duke shmangur rrezikun për banesat pranë zonës së përfshirë nga flakët.
Dy mjete zjarrfikëse u angazhuan në operacion për vënien nën kontroll të flakëve.
Por, një tjetër zjarr i qëllimshëm po në Novoselë, përfshiu pasditen e sotme një grumbull traversash të vjetra druri, të hequra nga hekurudha, duke shkaktuar tym të dendur që u përhap në Njësinë Administrative Novoselë dhe në fshatrat përreth.
Sipas informacioneve paraprake, flaka iu vu grumbullit të drurëve, të cilët më herët kanë shërbyer si pjesë e infrastrukturës hekurudhore.
Djegia e tyre shkaktoi shtëllunga të mëdha tymi të zi, duke krijuar shqetësim për banorët e zonës.
Në vendngjarje ndërhynë forcat zjarrfikëse, të cilat punuan për shuarjen e flakëve dhe normalizimin e situatës.
Rrethanat e ngjarjes dhe autorët e dyshuar të zjarrvënies po verifikohen nga autoritetet kompetente./Versus.al
