Një ndërprerje e papritur dhe masive e energjisë elektrike ka lënë pa drita pjesën më të madhe të Spanjës kontinentale, Portugalisë dhe disa zona të Francës. Shkaku i incidentit mbetet ende i paqartë, ndërkohë që operatori kombëtar spanjoll i energjisë, Red Eléctrica, ka konfirmuar se furnizimi ka nisur të rikuperohet në rajonet veriore dhe jugore të gadishullit Iberik.
Përballë kësaj situate emergjente, qeveria spanjolle ka thirrur menjëherë një mbledhje të kabinetit të krizës, ku marrin pjesë kryeministri Pedro Sánchez, zëvendëskryeministrat María Jesús Montero dhe Sara Aagesen, si dhe ministri i Transportit Óscar Puente.
Transporti publik është një nga sektorët më të goditur nga ndërprerja.
Shërbimet e metrosë dhe trenave Renfe janë paralizuar, me operatorët që kanë evakuuar pasagjerët për shkak të pamundësisë për të vazhduar funksionimin normal. Autoriteti i aeroporteve Aena ka njoftuar për “disa incidente”, por ka siguruar se aeroportet po operojnë me sisteme të përkohshme energjie.
Kaos është shkaktuar edhe në rrugët e qyteteve, ku mosfunksionimi i semaforëve ka sjellë pasiguri dhe konfuzion mes drejtuesve të mjeteve. Drejtoria e Trafikut (DGT) ka bërë thirrje për kujdes maksimal dhe shmangie të lëvizjeve të panevojshme.
Sipas Red Eléctrica, ndërprerja filloi rreth orës 12:30 dhe përshkruhet si një “incident jashtëzakonisht i rrallë”, që lidhet me një luhatje të fortë në rrjedhën e energjisë në rrjetin evropian, e cila ka shkëputur Spanjën nga sistemi i përbashkët kontinental. Origjina e problemit mbetet e panjohur.
I pyetur nëse mund të bëhet fjalë për një sulm kibernetik, Eduardo Prieto, drejtori i Shërbimeve Operative të Red Eléctrica, tha se është shumë herët për të nxjerrë përfundime apo për të spekuluar mbi shkaqet.
Ndërkohë, termocentrali bërthamor Cofrentes në Valencia ka aktivizuar planin e brendshëm të emergjencës në fazën paraprake të alarmit, si masë paraprake sigurie. Qeveria lokale ka deklaruar se centrali ka kapacitet të mjaftueshëm energjie për të funksionuar në mënyrë të pavarur për shtatë ditë përmes gjeneratorëve të tij rezervë.
