Mal i Zi- Një ushtar malazez është vënë nën hetim pasi e festoi ditën e flamurit të Shqipërisë ’28 nëntorin” me ushtarë shqiptarë dhe për më tepër duke bërë me duar shqiponjën dykrenare.
David Gorvokoviç i cili aktualisht është pjesë e misionit të NATO-s në Bullgari, shkaktoi reagime të shumta në Mal të Zi pas publikimit të fotos e cila shpejt u bë virale në rrjetet sociale.
Në artikullin e publikuar nga media malazeze "Vijesti" me titull: Pjesëtari i Ushtrisë së Malit të Zi bën ‘shqiponjën dykrenare’, raportohet se Ministri i Mbrojtjes i Malit të Zi, Dragan Krapoviç ka deklaruar se po kryhet një hetim për rastin në fjalë.
Ai foli po ashtu edhe për një incident tjetër që përfshin dy ushtarë malazezë të arrestuar në Kosovë. Ata u ndaluan në Deçan pasi në automjetin e tyre ishte shkruar “Kosova është Serbi”.
Më tej ministri nënvizoi se autoritetet do të veprojnë në përputhje me ligjin për të trajtuar këto situata. Për dy të ndaluarit, Gjykata Themelore në Pejë vendosi një muaj paraburgim. Prokurori atje i akuzoi ata për veprën penale “nxitje të urrejtjes”. Versus.al
