Një biznesmene iraniane me leje qëndrimi në Shtetet e Bashkuara është arrestuar në aeroportin ndërkombëtar të Los Angeles International Airport, nën akuzat se ka marrë pjesë në një skemë të gjerë të trafikimit të armëve në favor të regjimit të Teheranit.
Autoritetet amerikane bëjnë të ditur se 44-vjeçarja Shamim Mafi, e cila jetonte në Woodland Hills, është ndaluar gjatë fundjavës dhe është vënë nën akuzë për ndërmjetësim në marrëveshje të paligjshme armësh që përfshijnë dronë ushtarakë, bomba, siguresa shpërthyese dhe miliona fishekë municionesh të destinuara për Sudanin.
Sipas prokurorëve federalë, Mafi dyshohet se ka vepruar në koordinim të ngushtë me Ministrinë iraniane të Inteligjencës dhe Sigurisë, e cila jo vetëm e ka udhëzuar, por edhe e ka financuar krijimin e një biznesi në SHBA për të shërbyer si mbulim për aktivitetet e saj.
Në deklaratën zyrtare, zyrtari i lartë i drejtësisë amerikane Bill Essayli tha se ajo akuzohet për shkelje të ligjeve federale mbi sigurinë kombëtare dhe tregtinë e armëve, duke theksuar se bëhet fjalë për një rrjet të mirëorganizuar ndërkombëtar.
Hetimet tregojnë se përmes një kompanie të regjistruar në Oman, “Atlas International Business”, Mafi ka ndërmjetësuar marrëveshje të mëdha armësh deri në vitin 2025. Një nga kontratat më të mëdha dyshohet të ketë kaluar vlerën e 70 milionë dollarëve dhe ka përfshirë dronë luftarakë Mohajer-6 të prodhuar në Iran.
Këto pajisje, së bashku me dhjetëra mijëra pajisje shpërthyese, janë raportuar se janë dërguar drejt Sudanit, ku prej vitit 2023 vijon një luftë e përgjakshme civile.
Sipas raporteve ndërkombëtare, konflikti në Sudan ka shkaktuar dhjetëra mijëra viktima dhe ka zhvendosur miliona njerëz, duke u cilësuar si një nga krizat më të rënda humanitare në botë. Madje, hetimet e Kombeve të Bashkuara kanë paralajmëruar se disa prej mizorive në rajonin e Darfurit mbajnë “shenjat e një gjenocidi”.
Ndërkohë, autoritetet amerikane vijojnë hetimet për të zbuluar rrjetin e plotë të lidhjeve dhe përfshirjen e mundshme të aktorëve të tjerë në këtë skemë të dyshuar ndërkombëtare të armëve.
