Presidenti amerikan Donald Trump tha të dielën se Presidenti rus Vladimir Putin "është çmendur plotësisht" duke iu referuar zhvillimeve të fundit dhe bombardimeve të vazhdueshme ruse ndaj Ukrainës. Trump u shpreh i pakënaqur me atë që po bën Putin me urdhrat e dhënë dhe madje tha se presidenti rus ka ndryshuar shumë dhe se po vret njerëz pa arsye.
"Gjithmonë kam pasur një marrëdhënie shumë të mirë me Vladimir Putinin e Rusisë, por diçka i ka ndodhur atij. Ai është çmendur plotësisht! Ai po vret pa nevojë shumë njerëz, dhe nuk po flas vetëm për ushtarë. Raketa dhe dronë po qëllohen në qytete në Ukrainë, pa asnjë arsye", postoi Trump në Truth Social, disa orë pasi u tha gazetarëve, "Nuk jam i kënaqur me atë që po bën Putini. Ai po vret shumë njerëz, dhe nuk e di se çfarë dreqin i ndodhi Putinit".
Presidenti, në postimin e tij, më pas ia drejtoi kritikat e tij Presidentit ukrainas Volodymyr Zelensky, i cili tha të dielën në mëngjes se "heshtja e Amerikës" e inkurajon Putinin të vazhdojë sulmin e tij.
"Po kështu, Presidenti Zelenskyy nuk po i bën asnjë nder vendit të tij duke folur në mënyrën që flet", shkroi Trump. "Çdo gjë që del nga goja e tij shkakton probleme, nuk më pëlqen, dhe më mirë të ndalet."
Të paktën 12 persona u vranë në sulmet në të gjithë Ukrainën, përfshirë fëmijë, thanë zyrtarët, dhe dhjetëra të tjerë u plagosën. Rusia ka intensifikuar bombardimet ajrore të Ukrainës, ndërsa presioni ndërkombëtar rritet mbi Putinin për të pranuar një propozim për armëpushim.
“Bota mund të shkojë me pushime, por lufta vazhdon, pavarësisht fundjavave dhe ditëve të javës. Kjo nuk mund të injorohet. Heshtja e Amerikës dhe heshtja e të tjerëve në botë vetëm sa e inkurajon Putinin”, tha Zelensky të dielën në mëngjes. Versus.al
