Qeveria iraniane ka vendosur kufizime të përkohshme në aksesin në internet në të gjithë vendin, duke përmendur si arsye shqetësimet për sigurinë kombëtare. Vendimi është bërë i ditur nga Ministria e Teknologjisë së Informacionit dhe Komunikimit, e cila deklaroi se rrjeti kombëtar i komunikimit po keqpërdoret nga “armiku agresor” për qëllime ushtarake.
“Për shkak të keqpërdorimit të rrjetit kombëtar nga armiku për qëllime ushtarake dhe për rrezikimin e jetës dhe pronës së qytetarëve të pafajshëm, janë vendosur përkohësisht kufizime në aksesin në internet me vendim të autoriteteve kompetente,” – thuhet në deklaratë.
Ministria shtoi se shërbimet vendase të komunikimit dhe platformat lokale mbeten funksionale, dhe se po bëhen përpjekje për të ruajtur cilësinë e këtyre shërbimeve për qytetarët.
Ndërkohë, organizata ndërkombëtare NetBlocks, e cila monitoron lirinë dhe sigurinë e internetit në mbarë botën, konfirmoi ndërprerjen gati të plotë të internetit në Iran.
“Të dhënat e rrjetit tregojnë se Irani po përjeton një ndërprerje pothuajse të plotë kombëtare të internetit,” – deklaroi NetBlocks në një postim në platformën X (ish-Twitter).
Kjo ndërprerje vjen në një kontekst të rritur tensionesh rajonale dhe shqetësimesh për destabilitet të brendshëm, duke rikthyer kujtimet e ndërprerjeve të mëparshme që janë përdorur nga autoritetet iraniane gjatë valëve të protestave. /Versus.al
