Sulmet ajrore izraelite vranë të paktën 100 palestinezë në Rripin e Gazës gjatë natës, thanë autoritetet lokale të shëndetësisë, ndërsa ndërmjetësuesit nisën një raund të ri bisedimesh për armëpushim midis Izraelit dhe Hamasit.
Nuk pati asnjë koment të menjëhershëm nga ushtria izraelite, e cila ka zgjeruar sulmet e saj në enklavë, duke vrarë qindra njerëz që nga e enjtja, ndërsa përgatitet për një ofensivë të re tokësore për të siguruar "kontroll operacional" mbi pjesë të Gazës.
"Kemi të paktën 100 viktima nga mbrëmë. Familje të tëra u fshinë nga regjistri civil për shkak të bombardimeve izraelite", - tha për Reuters në telefon Khalil Al-Degran, një zëdhënës i Ministrisë së Shëndetësisë së Gazës.
Izraeli ka bllokuar hyrjen e ilaçeve, ushqimit dhe karburantit në Gaza që nga fillimi i marsit në një përpjekje për të ushtruar presion mbi Hamasin që të lirojë pengjet izraelite dhe ka miratuar plane që mund të përfshijnë pushtimin e të gjithë Rripit të Gazës dhe kontrollin e ndihmës. Hamasi thotë se do t'i lirojë pengjet në këmbim të një armëpushimi izraelit.
Vendet ndërmjetësuese, Egjipti dhe Katari, me mbështetjen e Shteteve të Bashkuara, filluan dje një raund të ri bisedimesh indirekte për një armëpushim midis dy palëve, por burime pranë negociatave i thanë Reuters se nuk ishte arritur ndonjë përparim i rëndësishëm.
Një zyrtar palestinez i informuar për bisedimet, të cilat po zhvillohen në Doha të Katarit, tha: "Hamasi është fleksibël në lidhje me numrin e pengjeve që mund të lirojë, por problemi ka qenë gjithmonë me angazhimin e Izraelit për t'i dhënë fund luftës".
Një nga sulmet e natës të Izraelit goditi një kamp me tenda që strehonte familje të zhvendosura në Khan Younis, në Rripin jugor të Gazës. Sipas punonjësve të emergjencës, midis të vdekurve ka gra dhe fëmijë. Dhjetëra njerëz të tjerë u plagosën dhe shumë tenda u dogjën totalisht. Hamasi foli për një "krim të ri barbar", duke fajësuar qeverinë amerikane për përshkallëzimin.
