Ministria e Mbrojtjes së Katarit ka konfirmuar se sistemet e mbrojtjes ajrore të vendit kanë kapur me sukses raketat iraniane të lëshuara drejt bazës ushtarake amerikane Al Udeid në Doha, duke shmangur viktimat dhe dëmet e mëdha.
Në një deklaratë zyrtare, Ministria njoftoi:
“Falë Zotit, vigjilencës së forcave të armatosura dhe masave paraprake të marra, incidenti nuk rezultoi në vdekje ose lëndime.”
Ky zhvillim vjen vetëm disa orë pasi Shtetet e Bashkuara të Amerikës goditën objektet bërthamore të Iranit në Fordow, Natanz dhe Isfahan, një akt që Teherani e cilësoi “agresion” dhe paralajmëroi për një hakmarrje të pashmangshme.
Sulmi iranian ka pasur në shënjestër bazën ajrore Al Udeid, e cila është më e madhja në Lindjen e Mesme për forcat amerikane, duke strehuar mbi 10,000 trupa dhe rreth 100 avionë luftarakë dhe bombardues.
Sipas burimeve diplomatike në rajon, SHBA dhe aleatët e Gjirit kanë pasur informacion paraprak mbi lëvizjet e Iranit dhe kanë qenë në gatishmëri për t’u përballur me sulmin. Ky fakt ka ndihmuar në shmangien e një katastrofe të mundshme.
Ngjarja thekson rrezikun në rritje të një përshkallëzimi rajonal, teksa tensionet midis Iranit dhe SHBA-së kanë arritur pikën më kritike në vitet e fundit. Analistët ndërkombëtarë paralajmërojnë se çdo incident i ardhshëm mund të çojë në përplasje më të gjerë në të gjithë Lindjen e Mesme.
Shtetet e Bashkuara nuk kanë dhënë ende një reagim zyrtar lidhur me këtë sulm apo masat e mëtejshme që mund të ndërmerren. /Versus.al
