Rusia po dërgon ushtarë të tjerë koreano-veriorë vijat e frontit, njoftoi SHBA. Por, sipas zëdhënësit të Këshillit të Sigurisë Kombëtare të Shtëpisë së Bardhë, John Kirby, disa ushtarë nga Korea e Veriut i kanë dhënë fund jetës vetëm që mos të kapen apo dorëzohen si robër tek forcat ukrainase.
“Këto vetëvrasje”, tha Kirby, “vijnë nga frika e hakmarrjes ndaj familjeve të tyre në Korenë e Veriut në rast se ata kapen”.
Agjencia Kombëtare e Inteligjencës e Koresë së Jugut kishte konfirmuar të premten se ushtari i Koresë së Veriut i kapur një ditë më parë nga forcat ukrainase kishte vdekur, shkruan yahooneës.
Vetëm dy ditë më parë, Presidenti ukrainas Volodymyr Zelensky tha në një deklaratë se të paktën 3,000 ushtarë të Koresë së Veriut kanë vdekur ose janë plagosur në rajonin Kursk të Rusisë, ku forcat ukrainase kryen një inkursion rrufe në gusht.
Nga ana tjetër Kirby citoi një numër më të ulët vdekjesh midis koreano-veriorëve, duke thënë se më shumë se 1,000 ushtarë kanë vdekur vetëm javën e kaluar.
Kjo shifër i shtohet edhe më shumë se 1,500 ushtarëve rusë që plagosen ose vriten çdo ditë, sipas ministrisë së Mbrojtjes së Britanisë, e cila vlerësoi se kishte mbi 45.000 viktima në nëntor, më e larta që nga fillimi i luftës.
Ndërsa numri i saktë i ushtarëve të Koresë së Veriut që vranë veten për të shmangur kapjen është i paqartë, Zelensky tha se ndërsa “disa” ushtarë të Koresë së Veriut u kapën, ata “u plagosën rëndë” dhe sugjeroi se disa prej tyre mund të jenë vrarë edhe nga shokët.








