Një nxënës 14-vjeçar vrau me armë zjarri dy gjimnazistë dhe dy mësues, ndërsa plagosi nëntë të tjerë në një shkollë të mesme në Xhorxhia të mërkurën, vetëm pak javë pas fillimit të vitit të ri shkollor, thanë autoritetet.
I dyshuari për sulmin, i identifikuar si Colt Grey, 14 vjeç, ishte nxënës i shkollës së mesme “Apalachee” në qytetin Ëinder rreth një orë nga Atlanta dhe ndodhet në paraburgim. Ai do të gjykohet si i rritur, tha Chris Hosey, drejtor i Byrosë së Hetimit të Xhorxhias.
Por sulmi i ndodhur nuk është i paparalajmëruar pasi një vit më parë, në maj të 2023-it, i mituri u shoqërua në komisariat ku muohoi të qëndronte pas disa postimeve në internet ku reklamoheshin imazhe të armëve. Asokohe 13 vjeçari mohoi të kishte bërë kërcënimet në internet, ndërsa zyrtarët e policisë u bënë thirrje mësuesve ta monitoronin vazhdimisht situatën e tij.
“Në atë kohë, nuk kishte asnjë arsye të mundshme për një arrestim apo për të ndërmarrë ndonjë veprim shtesë të zbatimit të ligjit në nivel lokal, shtetëror apo federal”, thotë FBI në një deklaratë.
I dyshuari dha dëshminë para hetuesve, pas ngjarjes së rëndë, por ata nuk pranuan të thonë nëse e dinin se çfarë e motivoi atë për sulmin. Ata gjithashtu nuk thanë se çfarë lloj arme është përdorur.
Sherifi Jud Smith tha se organet e rendit reaguan me shpejtësi pas njoftimit për të shtëna rreth orës 10:20 të mëngjesit. Individi i armatosur u përball me një punonjës të rendit dhe u dorëzua menjëherë, tha zoti Smith.
Forcat e rendit e vunë situatën nën kontroll dhe nxënësit u lanë të lirë të largohen, tha një zëdhënës i shkollave të Qarkut Barrow.
Televizioni ABC News citoi një dëshmitar, nxënësin Sergio Caldera, tek tha se ai ndodhej në orën e kimisë kur dëgjoi të shtëna armësh. Caldera, 17 vjeç, tha se mësuesja e tij kishte hapur derën, por një tjetër mësues që po vraponte i tha asaj ta mbyllte menjëherë pasi "një person me armë zjarri ndodhej në shkollë".
Ndërsa nxënësit e mësuesit ndodheshin në klasë, dikush kishte trokitur në derë dhe kishte bërtitur disa herë, duke kërkuar që ta hapnin. Në momentin që nuk po dëgjoheshin më të trokitura, Caldera tha se dëgjoi të shtëna dhe britma. Ai tha se klasa e tij ishte evakuuar më vonë. Versus.al
