Presidentja zviceriane, Karin Keller-Sutter, ka shkaktuar një përplasje diplomatike me Presidentin e SHBA-së, Donald Trump, gjatë një telefonate për çështjen e tarifave doganore.
Sipas të përditshmes zvicerane Tages-Anzeiger, gjatë telefonatës mes dy liderëve, nga Uashingtoni mbërriti një mesazh urgjent: “Mbylleni këtë bisedë, përndryshe situata do të përkeqësohet.” Dy minuta më pas, biseda midis Zvicrës dhe SHBA-së u ndërpre.
Presidentja e Zvicrës fluturoi për në Uashington më 5 gusht në një përpjekje të minutës së fundit për të ndaluar tarifat e reja të larta që kanë habitur vendin alpin.
Zvicra përballet me një taksë prej 39%, një nga më të lartat midis dhjetëra ekonomive që do të goditen nga tarifat e reja që pritet të hyjnë në fuqi nga 7 gushti.
Presidentja Karin Keller-Sutter dhe Ministri i Ekonomisë Guy Parmelin po shkonin në Uashington "për të lehtësuar takimet me autoritetet amerikane me një njoftim të shkurtër dhe për të zhvilluar bisedime me qëllim përmirësimin e situatës së tarifave për Zvicrën", tha qeveria në një deklaratë.
"Qëllimi është t'u paraqitet një ofertë më tërheqëse Shteteve të Bashkuara në një përpjekje për të ulur nivelin e tarifave reciproke për eksportet zvicerane, duke marrë parasysh shqetësimet e SHBA-së."
Presidenti i SHBA-së Donald Trump fillimisht kishte kërcënuar në prill se do të vendoste një tarifë prej 31% për Zvicrën.
Por ai e habiti vendin e orientuar drejt eksportit javën e kaluar kur vendosi ta rriste normën në 39% pavarësisht diskutimeve të shumta midis zyrtarëve zviceranë dhe amerikanë që synonin arritjen e një marrëveshjeje.
Qeveria zvicerane vuri në dukje se vendi do të goditet nga tarifa shumë më të larta sesa ato me të cilat po përballen ekonomitë e tjera të pasura, si Britania, Japonia apo Bashkimi Evropian.
