Moska shfrytëzoi paradën tradicionale të 9 Majit në Sheshin e Kuq për të prezantuar armën e saj të re, raketën lundruese “Geran-5”, e cila sipas raportimeve është përdorur tashmë në sulmet kundër Ukrainës. Reagimi nga Kievi ishte i menjëhershëm dhe kritik.
Pavarësisht se ceremonia e këtij viti ishte më e kufizuar se zakonisht, me mungesën e disa mjeteve të rënda ushtarake si tanket dhe automjetet e blinduara, Rusia tentoi të demonstronte fuqinë e saj ushtarake përmes arsenalit teknologjik.
Sipas medias së specializuar Defense Express, raketa “Geran-5” nuk u shfaq fizikisht në paradë, por u prezantua përmes një videoje, ku shihej në një platformë lëshimi në rajonin Oryol të Rusisë.
Droni-raketë, i montuar mbi një katapultë, u paraqit krah sistemeve të tjera ushtarake ruse dhe, sipas mediave ukrainase, ngjan me dronin ukrainas FP-5 Flamingo, por në përmasa më të vogla. “Geran-5” ka gjatësi rreth 6 metra dhe hapje krahësh rreth 5.5 metra, duke iu afruar më shumë një rakete të vogël lundruese sesa një droni tradicional të tipit Shahed.
Ndryshe nga modeli ukrainas FP-5, i cili mban një kokë luftarake prej rreth 1 ton, “Geran-5” ka një ngarkesë shumë më të vogël, rreth 90 kilogramë, si dhe një rreze veprimi tre herë më të shkurtër, rreth 1,000 kilometra.
Falë motorit reaktiv që i lejon të arrijë shpejtësi deri në 600 km/h, analistët ushtarakë vlerësojnë se “Geran-5” mund të përbëjë një kërcënim serioz për mbrojtjen ajrore ukrainase, veçanërisht nëse Rusia arrin ta prodhojë në masë.
Sipas shërbimeve sekrete ushtarake ukrainase, droni mund të pajiset edhe me raketa ajër-ajër R-73 me drejtim infra të kuq, duke i dhënë mundësi të godasë objektiva ajrore dhe të vështirësojë operacionet e ndërhyrjes nga helikopterët apo avionët luftarakë.
Ndërkohë, këshilltari presidencial ukrainas dhe ish-ministri i Industrive Strategjike, Oleksandr Kamyshin, e cilësoi “Geran-5” si një përpjekje të Rusisë për të kopjuar teknologjinë ukrainase.
Sipas tij, ngjashmëria mes “Geran-5” dhe FP-5 Flamingo tregon vetëm tentativën e Moskës për të imituar dizajnin ukrainas. Kamyshin deklaroi se modeli rus është dukshëm më pak efektiv, duke theksuar se koka luftarake është dhjetë herë më e vogël.
“Ajo që Rusia paraqet në vitin e pestë të luftës është vetëm një kopje e mjerueshme e një prej raketë-dronëve tanë ukrainas,” deklaroi ai.
