Gjatë samitit të Komunitetit Politik Evropian që po mbahet sot në Danimarkë, presidenti francez Emanuel Macron u shfaq me tone sfiduese ndaj forcës së Rusisë duke thënë se kjo e fundit nuk po e arrinte objektivin e saj kryesor në Ukrainë.
Ai deklaroi se Rusia nuk ka arritur dot në Kiev dhe as të ndikojë në qeverinë e Ukrainës. Sipas tij, situata është shumë më e mirë sot sesa në fillim të vitit, kur "një paqe e shpejtë ishte në prag dhe kishim dyshime për nivelin e mbështetjes nga SHBA". Për presidentin francez, kjo është për shkak të punës së Koalicionit të të Gatshmëve dhe suksesit me rifillimin e kontaktit me SHBA.
"Është shumë e rëndësishme, sepse për mua është një shembull konkret i kundërshtimit të dezinformimit të përhapur nga Rusia. Jo, Rusia nuk po fiton. Jo, Ukraina nuk po e humbet këtë luftë dhe situata është shumë e ndryshme", përsëriti Macron, i cili kërkoi edhe më shumë presion nda flotës ruse në hije.
Më herët Macron deklaroi se dronët që hyjnë në territorin e BE-së duhet të rrëzohen pa mëdyshje.
“Është jashtëzakonisht e rëndësishme të dërgojmë një mesazh të qartë: dronët që shkelin hapësirën ajrore të BE-së po marrin një rrezik të madh dhe mund të shkatërrohen. Pikë”, tha Macron. Versus.al
