Tensionet në Lindjen e Mesme janë rritur sërish pas një sulmi ndaj një cisterne të gazit të lëngshëm natyror (LNG) në Ngushticën strategjike të Hormuzit, për të cilin Katari ka akuzuar drejtpërdrejt Iranin.
Sipas autoriteteve të Dohas, anija “Al Rekayyat”, me flamur të Katarit, u godit gjatë natës nga një dron, duke shkaktuar një zjarr në dhomën e motorit. Burime të sigurisë detare bënë të ditur se flakët krijuan rrezik serioz për një shpërthim në bord, ndërsa ekuipazhi u raportua i sigurt dhe u evakuua pa pësuar lëndime.
Ministria e Jashtme e Katarit reagoi menjëherë, duke dënuar sulmin si një kërcënim të papranueshëm ndaj sigurisë së lundrimit ndërkombëtar dhe zinxhirit global të furnizimit me energji.
Në deklaratën zyrtare, Doha theksoi se Irani mban përgjegjësi të plotë ligjore për sulmin dhe për çdo pasojë që mund të ketë ai mbi sigurinë detare dhe tregjet ndërkombëtare të energjisë.
Situata në rajon u tensionua edhe më tej pasi, po gjatë së njëjtës ditë, një cisternë nafte me flamur saudit u dëmtua pranë brigjeve të Omanit. Ndërkohë, një agjenci e lidhur me Marinën Mbretërore Britanike raportoi një tjetër incident në Ngushticën e Hormuzit, ku një anije tregtare dyshohet se u godit nga një dron.
Seria e incidenteve ka ngritur shqetësime për sigurinë e një prej korridoreve më të rëndësishme detare në botë, përmes të cilit kalon një pjesë e konsiderueshme e eksporteve globale të naftës dhe gazit.
Ngjarjet vijnë në një moment tepër të ndjeshëm për rajonin, ndërsa në Iran po zhvillohen ceremoni masive zie për liderin suprem, Ajatollah Ali Khamenei. Qindra mijëra qytetarë kanë dalë në rrugët e qytetit të shenjtë të Kumit për t'i bërë homazhe udhëheqësit iranian.
Në të njëjtën kohë, presidenti amerikan Donald Trump ka ashpërsuar retorikën ndaj Teheranit, duke paralajmëruar se Shtetet e Bashkuara janë të gatshme të rifillojnë operacionet ushtarake nëse nuk arrihet një marrëveshje e re me Iranin.
“Ose do të bëjmë një marrëveshje, ose do ta përfundojmë punën”, deklaroi Trump, duke shtuar edhe më tej tensionet në një rajon që prej muajsh ndodhet në një situatë të brishtë sigurie./Versus.al
