Papa Leo do të udhëtojë të shtunën drejt Monakos, zonës së njohur për kazinotë dhe jahtet luksoze, në vizitën e tij të parë evropiane që nga zgjedhja si pontif në maj të vitit të kaluar. Kjo është vizita e parë papnore në Monako pas 488 vitesh, që nga Papa Pali III në 1538.
Pontifi do të niset nga Vatikani me helikopter dhe do të pritet në heliport nga Princi Albert dhe bashkëshortja e tij, Princesha Charlene, para se të shkojë në pallatin mbretëror të Grimaldit, rezidenca e familjes që nga shekulli i 13-të.
Zëdhënësi i Vatikanit, Matteo Bruni, e përshkroi Monakon si një “shtet të vogël me horizonte të mëdha” dhe një mundësi për Papa Leon për të folur për të gjithë Europën. Ai kujtoi imazhin biblik të “vogëlit që ka një rol të madh” dhe e përshkroi Monakon si një “laborator paqeje”, për shkak të përdorimit të përgjegjshëm të pasurisë dhe influencës.
Pas një takimi privat me princin Albert, Papa Leo do të vizitojë katedralen e Monakos me popemobilin dhe më pas do të kremtojë meshën në Stade Louis-II. Rreth 15,000 katolikë pritet të marrin pjesë, shumë prej tyre duke ardhur nga Italia. Pjesëmarrja është falas, por duhej të rezervonin paraprakisht vendin.
Monako, megjithëse i pasur, mbetet shumë katolik dhe një nga pak vendet evropiane ku katolicizmi është feja zyrtare. Numri i kishave katolike – pesë – është më i madh se ai i kazinove. Temat kryesore të vizitës do të përqendrohen te mbrojtja e jetës, siç theksoi Bruni, duke përfshirë edhe kontekstin e luftërave dhe konflikteve.
Vizita e Papa Leos është një zgjedhje surprizë për disa analistë të Vatikanit, pasi paraardhësi i tij, Papa Françesku, njihej për udhëtimet në zona të margjinalizuara. Por sipas gazetarëve, zgjedhja e Monakos mund të shihet si një gjest delikatesë ndaj shteteve të vogla evropiane, ndërkohë që vizita është e përballueshme brenda një dite.
Papa Leo ka kryer vizita të tjera jashtë vendit, duke përfshirë Turqinë dhe Libanin në nëntor, dhe në prill do të udhëtojë për 10 ditë në Afrikë. Ai gjithashtu ka marrë ftesë nga Shtëpia e Bardhë, por nuk e ka pranuar ende, duke preferuar të mos japë përshtypjen se i jep përparësi vendit të tij.
