Sipas kanalit gjerman të informacionit WELT, një mbledhje e brendshme për çështje sigurie është mbajtur pasditen e djeshme në NATO, ku janë zbuluar detaje të reja mbi incidentin e rëndë që përfshiu hapësirën ajrore të Aleancës të mërkurën me dronet që dyshohet se u nisen nga Rusia. Sipas burimeve të gazetës, hetimi paraprak nga autoritetet polake tregon se pesë dronë ishin drejtuar drejt një baze të NATO-s, e cila përdoret për të transportuar ndihma ushtarake drejt Ukrainës.
“Tre prej dronëve u rrëzuan nga avionë luftarakë F-35 të Forcave Ajrore Holandeze. Dy të tjerë u rrëzuan në mënyrë të paqartë. Rrethanat e sakta mbeten ende të paqarta,” raportojnë mediat gjermane.
Provë e reagimit të NATO-s?
“Bazuar në informacionet që kemi aktualisht, besojmë se dronët kanë hyrë qëllimisht në hapësirën ajrore të NATO-s,” deklaroi një zyrtar i lartë i NATO-s për median gjermane. Aleanca dyshon se qëllimi i operacionit ishte testimi i kapacitetit të reagimit të NATO-s – sa shpejt do të reagonte dhe çfarë mjetesh do të përdorte për të neutralizuar një kërcënim të tillë.
Sipas të njëjtave burime, nuk janë gjetur eksplozivë në mbetjet e dronëve, çka nënkupton se Rusia nuk kishte qëllim të godiste drejtpërdrejt një objektiv.
Reagimi i Polonisë dhe kërkesa në OKB
Ngjarja ka shkaktuar një alarm të madh në Poloni, e cila së bashku me aleatët e saj e konsideron incidentin si një shkelje të qëllimshme të hapësirës ajrore, ndonëse Moska e mohon një gjë të tillë.
“Me kërkesë të Polonisë, do të thirret një mbledhje e jashtëzakonshme e Këshillit të Sigurimit të Kombeve të Bashkuara në lidhje me shkeljen e hapësirës ajrore polake nga Rusia,” bëri të ditur Ministria e Punëve të Jashtme të Polonisë në rrjetin X (ish-Twitter).
Ministri i Jashtëm polak, Radosław Sikorski, deklaroi për radion RMF FM se Polonia dëshiron “t’i tërheqë vëmendjen botës ndaj këtij sulmi të paprecedentë me dronë rusë kundër një vendi që është jo vetëm anëtar i OKB-së, por edhe i Bashkimit Evropian dhe i NATO-s.”
