Ukraina nuk do ta njohë ligjërisht pushtimin rus të Krimesë në asnjë rrethanë. Kështu u shpreh mbrëmjen e djeshme presidenti ukrainas Volodymyr Zelensky gjatë një takimi informues.
"Nuk ka asgjë për të folur. Kjo shkel Kushtetutën tonë. Ky është territori ynë, territori i popullit të Ukrainës", u tha Zelensky gazetarëve.
Deklarata vjen mes raportimeve se njohja e Krimesë si territor rus po konsiderohet si pjesë e një propozimi të mbështetur nga SHBA-të për t'i dhënë fund luftës në Ukrainë.
Zelensky paralajmëroi se çdo diskutim për Krimenë rrezikon zhvendosjen e negociatave në një kornizë të diktuar nga Kremlini. Ai tha se propozime të tilla luajnë drejtpërdrejt në "lojën" e Presidentit rus Vladimir Putin.
"Sapo të fillojnë bisedimet për Krimenë dhe territoret tona sovrane, bisedimet hyjnë në formatin që dëshiron Rusia - zgjatjen e luftës - sepse nuk do të jetë e mundur të bien dakord për gjithçka shpejt", shtoi ai.
Duke pranuar se sinjalet për Krimenë kanë dalë në kanale të ndryshme, Zelensky tha se Ukraina do të refuzonte menjëherë çdo propozim zyrtar.
"Ne e dimë se nga po vijnë këto sinjale dhe do të vazhdojmë të dëgjojmë", tha ai, duke shtuar se nuk ishte i sigurt nëse ato vinin nga Rusia apo nga përfaqësues të caktuar të SHBA-së që ishin angazhuar në dialog me Putinin. Versus.al
