Presidenti Vladimir Putin tha të martën se 100,000 trupa po merrnin pjesë në manovrat ruso-bjelloruse "Zapad-2025", një pjesë e të cilave po zhvillohen në pragun e BE-së dhe po shkaktojnë shqetësim në Kiev dhe në Bashkimin Evropian.
"Stërvitjet po zhvillohen në 41 poligone stërvitore me pjesëmarrjen e 100,000 personelit ushtarak. Do të përdoren dhe po përdoren afërsisht 10,000 sisteme armësh dhe pajisje ushtarake", tha Putin, sipas komenteve të transmetuara në televizionin rus.
Sipas presidentit rus, qëllimi i këtyre manovrave është të "vendosen të gjithë elementët e nevojshëm për mbrojtjen pa kushte të sovranitetit, integritetit territorial dhe mbrojtjes nga çdo agresion" të aleancës midis Rusisë dhe Bjellorusisë.
Disa nga këto ushtrime u zhvilluan në Bjellorusi, një vend që kufizohet me BE-në, nën syrin vigjilent të fqinjëve të saj si Polonia dhe shtetet baltike, të cilat kanë marrë masa sigurie.
Sipas Ministrisë së Mbrojtjes Ruse, Zapad-2025 përfshinte, përtej komponentëve tradicionalë të ushtrisë, "përdorimin masiv të dronëve" dhe "mjeteve të luftës elektronike", duke marrë parasysh "përvojën e fituar" në frontin ukrainas.
Trupat e përfshira po stërviten për të "sprapsur agresionin ushtarak në shkallë të gjerë" në "tre fronte dhe në zonën e Arktikut".
Këto përfshijnë kontingjente ushtarake nga Irani dhe India, si dhe vende të tjera aziatike dhe afrikane.
“Grupi i koalicionit përfshin grupe operative dhe kontingjente ushtarake nga forcat e armatosura të Bangladeshit, Bjellorusisë, Indisë dhe Iranit. Forcat e armatosura të Burkina Fasos, Kongos dhe Malit gjithashtu kanë dërguar grupet e tyre operative”, raportuan agjencitë ruse të lajmeve, duke cituar dokumente të Kremlinit.
Sipas Minskut, përfaqësues nga rreth 20 vende po marrin pjesë në ushtrime, përfshirë Shtetet e Bashkuara, Hungarinë dhe Turqinë, të cilat janë anëtare të NATO-s dhe po kryejnë role vëzhguese të kësaj stërvitje.
