Një sulm me dron rus, më i madhi që Moska ka ndërmarrë që nga fillimi i luftës në vitin 2022 sipas të dhënave të disponueshme, vrau një grua në rajonin e Kievit dhe plagosi tre persona të tjerë, thanë autoritetet ukrainase këtë mëngjes, ndërsa Moska përshkallëzon sulmet e saj pas bisedimeve të paqes të së premtes.
Rusia nisi 273 dronë deri në orën 8 të mëngjesit, duke synuar kryesisht rajonin e Kievit, në Ukrainën qendrore, dhe rajonet e Dnipropetrovskut dhe Donetskut në lindje, sipas Forcave Ajrore të Ukrainës.
Bazuar në të dhënat e ofruara nga Forcat Ajrore, ky ishte sulmi më i madh me dron i Rusisë kundër Ukrainës gjatë luftës. Në prag të përvjetorit të tretë të pushtimit rus të Ukrainës, më 23 shkurt, Moska lëshoi një numër rekord prej 267 dronësh.
As a result of the night strikes, the warehouses of the Ukrainian Air Force airbase in Vasylkiv near Kiev are engulfed in flames, the glow is visible from Kyiv (25 kilometers from Vasylkiv) pic.twitter.com/rwO4JU9oAT
— Sprinter Observer (@SprinterObserve) May 18, 2025
Bisedimet e para të drejtpërdrejta në tre vjet midis Rusisë dhe Ukrainës, të mbajtura të premten, nuk sollën armëpushimin e kërkuar nga Kievi dhe aleatët e tij. Bisedimet 100-minutëshe në Stamboll rezultuan në një marrëveshje për shkëmbimin e të burgosurve të luftës, 1.000 nga secila palë.
Presidenti i SHBA-së, Donald Trump, tha se do të flasë të hënën me presidentin rus, Vladimir Putin, dhe presidentin ukrainas, Volodymyr Zelensky.
Sulmi i sotëm me dron rus vrau një grua 28-vjeçare në zonën e kryeqytetit dhe plagosi të paktën tre persona të tjerë, përfshirë një fëmijë katërvjeçar, thanë autoritetet ukrainase.
"Fatkeqësisht, si pasojë e sulmit të armikut në distriktin Obukhiv, një grua ndërroi jetë nga plagët e marra", tha Mykola Kalashnik, guvernator i rajonit të Kievit, në një postim në Telegram.
Kievi, zona përreth tij dhe pjesa më e madhe e gjysmës lindore të Ukrainës ishin në gatishmëri për sulme ajrore për disa orë. Njësitë e mbrojtjes kundërajrore u aktivizuan disa herë duke u përpjekur të sprapsnin sulmet, informoi ushtria nëpërmjet Telegramit.
"Ishte një natë e vështirë. Rusët gjithmonë kanë përdorur luftën dhe sulmet për të frikësuar të gjithë në negociata", - tha Andriy Kovalenko, kreu i Qendrës Ukrainase për Luftimin e Dezinformimit, nëpërmjet Telegram , duke iu referuar sulmit të sotëm.
Njësitë e mbrojtjes ajrore shkatërruan 88 dronë gjatë natës, sipas Forcave Ajrore Ukrainase.
Dje, një sulm me dron rus vrau 9 civilë, pasi goditi një minibus në rajonin Sumy, në Ukrainën verilindore, sipas Kievit.
Të gjithë të plagosurit në rrethin Obukhiv, në jug të qytetit të Kievit, u dërguan në spitale, tha Kalashnik. Sipas tij, disa pallate në zonë u dëmtuan.
