Komiteti Ekonomik dhe Social Europian (EESC), një institucion me bazë në Bruksel që jep opinione jo-detyruese për politikat e BE-së, është tronditur nga një seri letrash anonime që ngrenë dyshime për ndërhyrje të paligjshme në procedurat e prokurimit.
Sipas raportimit të Euractiv, në këto komunikime pretendohet se një zyrtar i lartë mund të ketë ndikuar në mënyrë të padrejtë në dhënien e kontratave, duke favorizuar subjekte të caktuara.
Drejtuesit e institucionit kanë reaguar duke i referuar menjëherë të gjitha informacionet te Zyra Europiane Kundër Mashtrimit (OLAF), e cila ka nisur një proces verifikimi për të vlerësuar vërtetësinë e akuzave dhe për të përcaktuar nëse ka shkelje ligjore.
Burimet bëjnë të ditur se hetimi është ende në fazë paraprake dhe nuk ka ende përfundime zyrtare.
Megjithatë, rasti konsiderohet i ndjeshëm për shkak të rolit të EESC në përfaqësimin e organizatave të shoqërisë civile dhe partnerëve socialë në nivel europian.
Edhe pse Komiteti nuk merr vendime detyruese, një skandal i tillë mund të ndikojë në besueshmërinë e institucioneve të BE-së dhe në perceptimin për transparencën e proceseve të brendshme./Përshtati Versus.al
