Gjithçka është gati në Vatikan për ceremoninë e sotme në të cilën Leo XIV do të marrë zyrtarisht detyrat e tij. Puna ka filluar tashmë në apartamentet papnore që kishin qenë bosh për 12 vjet, pasi Papa i ri pritet të kthehet në Pallatin Apostolik, ndryshe nga Françesku, i cili banonte në një dhomë modeste në shtëpinë e mysafirëve Santa Marta të Vatikanit.
Pak para fillimit zyrtar të mandatit të tij, Papa Leo XIV bëri përsëri thirrje për t'i dhënë fund luftërave në Ukrainë dhe Gaza dhe për të dërguar një mesazh kundër pabarazive sociale.
"Ne duhet të ndërtojmë një botë ku të gjithë jetojnë me dinjitet, të vërtetë, drejtësi dhe paqe. Shpresoj që kjo të ndodhë kudo, duke filluar nga ata që vuajnë më shumë, në Ukrainë dhe në Tokën e Shenjtë", - tha Leoni IV.
Masa ekstreme sigurie
Masat e sigurisë në Vatikan dhe Romë janë të rrepta, pasi 200 delegacione shtetërore dhe ndërkombëtare nga e gjithë bota do të marrin pjesë në shërbesë.
Delegacioni i Shteteve të Bashkuara do të udhëhiqet nga zëvendëspresidenti J.D. Vance. Në fakt, Marco Rubio u takua me kardinalë, përfshirë numrin 2 të Vatikanit, Pietro Parolin. U konfirmua gjithashtu prania e Presidentit të Ukrainës, Volodymyr Zelensky.
Ceremonia e inaugurimit të Papa Leo XIV është planifikuar për në orën 10:00. Ekranet gjigante janë vendosur tashmë në mënyrë që qindra mijëra besimtarë që priten në Sheshin e Shën Pjetrit të mund ta ndjekin ceremoninë.
Elementi qendror i ceremonisë do të jetë dorëzimi i "unazës së peshkatarit" Papës nga Dekani Giovanni Battista Re. Kjo unazë simbolizon lidhjen e drejtpërdrejtë me Shën Pjetrin dhe vazhdimësinë e shërbesës apostolike, duke përbërë një nga simbolet më të rëndësishme të zyrës papnore në Vatikan.
Kush është Papa Leo XIV?
Robert Francis Presvost , Papa i ri, është nga Çikago dhe është 69 vjeç. Ai është i pari nga Shtetet e Bashkuara dhe konsiderohet një hierark me pikëpamje të afërta me Papa Françeskun.
Ai u bë kardinal nga Papa Françesku vetëm në vitin 2023, por është një person i zgjedhur prej tij për pozicione të rëndësishme brenda Kishës që i kanë dhënë ndikim të konsiderueshëm. Ai ishte një ish-udhëheqës i urdhrit Agustinian dhe u vendos gjithashtu në zyrën e fuqishme që mbikëqyr përzgjedhjen e peshkopëve të rinj nga e gjithë bota.
Origjina e tij nga SHBA-ja, siç doli më vonë, nuk u bë pengesë për zgjedhjet, siç do të kishin pritur shumë. Për shumë vite ka pasur një lloj tabuje kundër zgjedhjes së një Pape amerikan, duke pasur parasysh fuqinë gjeopolitike që Shtetet e Bashkuara tashmë kanë. Megjithatë, nëse ka diçka që mund ta lehtësojë këtë disavantazh, ajo është aktiviteti i tij i gjerë në Peru, ku jetoi për vite me radhë si misionar dhe më pas si kryepeshkop. Ai ka edhe shtetësi peruane.
