Zërat për një hyrje të mundshme të Pier Silvio Berlusconi në politikë janë rikthyer sërish në qarkullim, pas një deklarate të vetë zv/presidentit ekzekutiv të Mediaset, i cili gjatë prezantimit të orarit të ri të kompanisë televizive, pranoi se “nuk e përjashton” një angazhim politik në të ardhmen.
“Unë jam 56 vjeç, babai im ishte 58 vjeç kur hyri në politikë. Sot nuk kam asnjë qëllim, por nuk e përjashtoj që një ditë të them: ‘Pse jo, një sfidë e re’”, tha ai, duke shtuar se aktualisht është i përqendruar në menaxhimin e Mediaset.
Deklarata e tij u prit me entuziazëm nga kampi konservator italian. Antonio Tajani, Sekretari i Përgjithshëm i Forza Italia, komentoi:
“Nëse Pier Silvio vendos të hyjë në politikë, do të ishte një gjë e shkëlqyer. Me emrin që mban dhe përvojën që ka, do të ishte gjithmonë një gjë pozitive. Ne do të ishim absolutisht të lumtur.”
Pier Silvio, djali i ish-kryeministrit dhe themeluesit të Forza Italia, Silvio Berlusconi, ka zgjedhur deri më tani të qëndrojë larg politikës, duke drejtuar perandorinë mediatike të trashëguar nga babai. Por ai vetë e pranoi se “ka një pasion për njerëzit e zakonshëm” dhe ndonjëherë e ndjen se ky pasion mund të përkthehet në diçka më shumë.
Megjithatë, ai theksoi se politika është edhe kompromis dhe negociatë, gjë që për momentin nuk e tërheq.
Në fund të fjalës së tij, Berlusconi i ri ndau një reflektim emocional për babanë e ndjerë:
“E vlerësoj më shumë se më parë, më mungon më shumë se më parë. Po të ishte gjallë, do të kishte bërë gjithçka për të ndalur luftërat në Ukrainë dhe në Gaza. Do të kishte çmendur gjithë botën për paqen.”
Pier Silvio Berlusconi nuk dha një premtim të qartë politik, por dyert mbeten hapur, dhe në një klimë politike gjithnjë e më të polarizuar në Itali, emri Berlusconi mbetet një simbol i fortë që mund të rikthehet në skenë. /Versus.al
