Liban- Mbi dhjetë sulme të njëpasnjëshme goditën Bejrutin mbrëmjen e djeshme në periferitë jugore. Agjencia zyrtare libaneze e lajmeve, ANI, raportoi se e mbrëmshmja ishte një nga bastisjet më të dhunshme që prej fillimit të operacionit izraelit ndaj Libanit.
“Gjatë natës, toka u drodh nën këmbët tona. Qielli u ndriçua për shkak të forcës së shpërthimeve dhe dukej si një qytet fantazmë”- u shpreh një shofer taksie 31 vjeçar nga periferitë jugore të Bejrutit.
Sipas mediave të huaja, bastisja në Bejrut synonte një takim ku mori pjesë Safi Al-Din, pasardhësi i mundshëm i Nasrallahut në krye të Hezbollahut. Raketat kishin qëllim bombardimin e bunkerit të nëndheshëm ku dyshohej se po mbahej takimi mes Safi Al-Din dhe liderëve të rëndësishëm të lëvizjes Shiite libaneze.
"Ne mund të shmangim" një "luftë gjithëpërfshirëse" në Lindjen e Mesme, tha të enjten Presidenti i SHBA Joe Biden, i pyetur për këtë temë në një kohë kur komuniteti ndërkombëtar i frikësohet konfliktit në shkallë të gjerë në rajon. "Unë nuk mendoj se do të ketë një luftë totale. Unë mendoj se ne mund ta shmangim atë. Por ka ende shumë për të bërë," theksoi ai para gazetarëve.
Ndërkohë, vendet e huaja kanë nisur me evakuuimet e shtetasve të tyre nga Libani ku Izraeli ka nisur edhe një operacion tokësor me qëllim shkatërrimin e bazave të Hezbollahut. Nga ana tjetër, Irani pak ditë më parë e sulmoi Izraelin me qindra raketa balistike si hakmarrje për vrasjen e kreut të Hezbollahut. Izraeli ka premtuar hakmarrje të ashpër teksa i gjithë rajoni i Lindjes së Mesme rrezikon të hyjë në luftë totale. Versus.al
