Presidenti i Shteteve të Bashkuara, Donald Trump, ka deklaruar se mund të anulojë një takim të planifikuar me homologun e tij kinez, Xi Jinping, këtë muaj për shkak të çështjeve të teknologjisë dhe tregtisë.
Trump dhe Xi pritej të takoheshin në kuadër të samitit të Bashkëpunimit Ekonomik Azi-Paqësor (APEC) në fund të këtij muaji, në një përpjekje për të ulur tensionet ekonomike.
Por në një postim në rrjetet sociale të premten, Trump kritikoi Kinën për kontrollet e reja që njoftoi mbi eksportin e metaleve të rralla të tokës. Presidenti amerikan gjithashtu e kërcënoi Kinën me mundësinë e tarifave të larta duke e konsideruar si vend armik.
"Nuk kam folur me Presidentin Xi sepse nuk kishte arsye për ta bërë këtë. Kjo ishte një surprizë e vërtetë, jo vetëm për mua, por për të gjithë Udhëheqësit e Botës së Lirë", tha Trump. "Do të takohesha me Presidentin Xi pas dy javësh, në APEC, në Korenë e Jugut, por tani duket se nuk ka arsye për ta bërë këtë."
Marrëdhënia midis Trump dhe homologut të tij kinez ka qenë e trazuar dhe të dy kanë vendosur masa të reja që synojnë të kundërshtojnë njëri-tjetrin në fushat ku ata po konkurrojnë për ndikim, siç është zhvillimi teknologjik.
Metalet e rralla të tokës janë jetike për një zhvillim të tillë, dhe Kina kryeson botën në rafinimin e metaleve për përdorim në pajisje si kompjuterë, telefona inteligjentë dhe armë ushtarake.
Të enjten, Kina zbuloi një sërë kufizimesh të reja mbi eksportet e këtyre produkteve. Nga 17 elementët që konsiderohen metale të rralla të tokës, Kina tani do të kërkojë licenca eksporti për 12 prej tyre.
Teknologjitë e përfshira në përpunimin e metaleve do të përballen gjithashtu me kërkesa të reja licencimi. Ndër masat është edhe një proces i veçantë miratimi për kompanitë e huaja që dërgojnë elementë metalikë jashtë vendit. Versus.al
